«Rosavıasıa» jarıalaǵan jolaýshylar tizimi mynandaı:
Propustin Sergey
Makaryan Evgeniy
Totmin Aleksandr
Chekalov Valeriy
Utkin Dmitriy
Matuseev Nikolay
Prigozhin Evgeniy
Levshin Aleksei, komandır
Karimov Rustam, ekinshi pılot
Raspopova Kristina, bortserik.
Degenmen qazirge deıin Prıgojın men Ýtkınniń qaza bolǵanyna qatysty resmı málimet joq. Kreml de ushaq apatyna qatysty eshqandaı málimdeme jasamady.
Reseı tótenshe jaǵdaı mınıstrliginiń habarlaýynsha, bortta on adam (úsh ekıpaj múshesi men jeti jolaýshy) bolǵan. Olardyń bári qaza tabýy múmkin. RIA Novostı aqparat agenttigi ushaq qulaǵan mańnan on adamnyń súıegi tabylǵanyn jazdy. Reseıdiń tergeý komıteti Tver oblysyndaǵy ushaq apatyna baılanysty is qozǵap tergeý bastaǵanyn málimdedi.
Keıbir sarapshylar ushaq jolaýshylar tiziminde Prıgojın bolǵanymen, onyń bortqa minbeýi de múmkin degendi alǵa tartady. Buǵan qosa, keıbir basylymdar men sarapshylar Prıgojın men Ýtkınge "uqsas adamdardyń" bolǵanyn eske saldy.
Kremlshil "Rossıa 24" telearnasy Prıgojınniń qaza tapqanyn aıtty. Reseı bıligin qoldaıtyn "Sargrad" telearnasy da derekkózine silteme jasap, oqıǵa ornynda Prıgojın men Ýtkınniń máıitteri "anyqtalǵanyn" habarlady. "Vagnerge" jaqyn Grey Zone telegram-kanaly Prıgojın men Ýtkın "Reseıdi satqandardyń áreketinen qaza tapty" dep, olardyń qazasyn rastady.
Ushaqtyń qulaǵan sáti vıdeoǵa túsip qalǵan. Bul vıdeony "Baza" jáne Mash telegram-arnalary jarıalady (vıdeoda bylapyt sózder bar).
Reseılik jýrnalıs Ksenıa Sobchak derekkózine silteme jasap, apatqa ushyraǵan bortta Prıgojın de bolǵanyn jazdy. Al Reseı okýpasıalap alǵan Zaporoje oblysynyń ókili Vladımır Rogov "Vagner" ókilderimen sóıleskenin, olar Prıgojın men Ýtkınniń qazasyn rastaǵanyn aıtady.
Prıgojınniń ókilderi jaǵdaıǵa baılanysty ázirge málimdeme jasamady. "Vagnermen" baılanysy bar Grey Zone kanalynyń jazýynsha, ushaqty raketaǵa qarsy qurylǵy atyp túsirýi múmkin.
Eki aı buryn Prıgojın bastaǵan "Vagner" otrády búlik shyǵaryp, Máskeýge qaraı attanǵan. Búlik kezinde Reseı áýe kúshteriniń birneshe ushaǵy men tikushaǵy qulaǵan. Búlikke qatysty qozǵalǵan is keıin toqtap, "Vagner" jasaǵy Aleksandr Lýkashenkonyń shaqyrtýymen Belarýske attanǵan edi. Al Prıgojın biraz ýaqyt Reseıde bolǵan.
21 tamyzda Prıgojın vıdeo jarıalap, Afrıkada júrgenin aıtqan.
Evgenıı Prıgojın – bıznesmen, Pýtınniń jaqyny. Ol restoran bıznesiniń uıymdastyrýshysy retinde tanyldy. Prıgojın Kremldi tamaqpen qamtamasyz etkendikten jurt ony "Pýtınniń aspazy" deıdi. Keıin Prıgojın men Ýtkın "Vagner" jeke áskerı tobyn qurady. "Vagner" beıresmı túrde Kremldiń atynan Sırıadaǵy, Afrıkadaǵy qaqtyǵystarǵa, keıin Ýkraınadaǵy soǵysqa qatysty.
Ýkraınadaǵy soǵys kezinde "Vagner" Bahmýt úshin shaıqasty. Keıin Prıgojın Reseı qorǵanys mınıstri men Reseı áskeriniń qolbasshylaryn jıi synap, talaptar qoıa bastaǵan. Búlikten soń "Vagner" toby Ýkraınadaǵy soǵysqa aralasýyn toqtatyp, Prıgojın jurt kózine sırek kórine bastaǵan edi.
