«روساۆياسيا» جاريالاعان جولاۋشىلار ءتىزىمى مىنانداي:
Propustin Sergey
Makaryan Evgeniy
Totmin Aleksandr
Chekalov Valeriy
Utkin Dmitriy
Matuseev Nikolay
Prigozhin Evgeniy
Levshin Aleksei، كوماندير
Karimov Rustam، ەكىنشى پيلوت
Raspopova Kristina، بورتسەرىك.
دەگەنمەن قازىرگە دەيىن پريگوجين مەن ۋتكيننىڭ قازا بولعانىنا قاتىستى رەسمي مالىمەت جوق. كرەمل دە ۇشاق اپاتىنا قاتىستى ەشقانداي مالىمدەمە جاسامادى.
رەسەي توتەنشە جاعداي مينيسترلىگىنىڭ حابارلاۋىنشا، بورتتا ون ادام (ءۇش ەكيپاج مۇشەسى مەن جەتى جولاۋشى) بولعان. ولاردىڭ ءبارى قازا تابۋى مۇمكىن. ريا نوۆوستي اقپارات اگەنتتىگى ۇشاق قۇلاعان ماڭنان ون ادامنىڭ سۇيەگى تابىلعانىن جازدى. رەسەيدىڭ تەرگەۋ كوميتەتى تۆەر وبلىسىنداعى ۇشاق اپاتىنا بايلانىستى ءىس قوزعاپ تەرگەۋ باستاعانىن مالىمدەدى.
كەيبىر ساراپشىلار ۇشاق جولاۋشىلار تىزىمىندە پريگوجين بولعانىمەن، ونىڭ بورتقا مىنبەۋى دە مۇمكىن دەگەندى العا تارتادى. بۇعان قوسا، كەيبىر باسىلىمدار مەن ساراپشىلار پريگوجين مەن ۋتكينگە "ۇقساس ادامداردىڭ" بولعانىن ەسكە سالدى.
كرەملشىل "روسسيا 24" تەلەارناسى پريگوجيننىڭ قازا تاپقانىن ايتتى. رەسەي بيلىگىن قولدايتىن "سارگراد" تەلەارناسى دا دەرەككوزىنە سىلتەمە جاساپ، وقيعا ورنىندا پريگوجين مەن ۋتكيننىڭ مايىتتەرى "انىقتالعانىن" حابارلادى. "ۆاگنەرگە" جاقىن Grey Zone تەلەگرام-كانالى پريگوجين مەن ۋتكين "رەسەيدى ساتقانداردىڭ ارەكەتىنەن قازا تاپتى" دەپ، ولاردىڭ قازاسىن راستادى.
ۇشاقتىڭ قۇلاعان ءساتى ۆيدەوعا ءتۇسىپ قالعان. بۇل ۆيدەونى "بازا" جانە Mash تەلەگرام-ارنالارى جاريالادى (ۆيدەودا بىلاپىت سوزدەر بار).
رەسەيلىك جۋرناليست كسەنيا سوبچاك دەرەككوزىنە سىلتەمە جاساپ، اپاتقا ۇشىراعان بورتتا پريگوجين دە بولعانىن جازدى. ال رەسەي وككۋپاسيالاپ العان زاپوروجە وبلىسىنىڭ وكىلى ۆلاديمير روگوۆ "ۆاگنەر" وكىلدەرىمەن سويلەسكەنىن، ولار پريگوجين مەن ۋتكيننىڭ قازاسىن راستاعانىن ايتادى.
پريگوجيننىڭ وكىلدەرى جاعدايعا بايلانىستى ازىرگە مالىمدەمە جاسامادى. "ۆاگنەرمەن" بايلانىسى بار Grey Zone كانالىنىڭ جازۋىنشا، ۇشاقتى راكەتاعا قارسى قۇرىلعى اتىپ ءتۇسىرۋى مۇمكىن.
ەكى اي بۇرىن پريگوجين باستاعان "ۆاگنەر" وتريادى بۇلىك شىعارىپ، ماسكەۋگە قاراي اتتانعان. بۇلىك كەزىندە رەسەي اۋە كۇشتەرىنىڭ بىرنەشە ۇشاعى مەن تىكۇشاعى قۇلاعان. بۇلىككە قاتىستى قوزعالعان ءىس كەيىن توقتاپ، "ۆاگنەر" جاساعى الەكساندر لۋكاشەنكونىڭ شاقىرتۋىمەن بەلارۋسكە اتتانعان ەدى. ال پريگوجين ءبىراز ۋاقىت رەسەيدە بولعان.
21 تامىزدا پريگوجين ۆيدەو جاريالاپ، افريكادا جۇرگەنىن ايتقان.
ەۆگەنيي پريگوجين – بيزنەسمەن، ءپۋتيننىڭ جاقىنى. ول رەستوران بيزنەسىنىڭ ۇيىمداستىرۋشىسى رەتىندە تانىلدى. پريگوجين كرەملدى تاماقپەن قامتاماسىز ەتكەندىكتەن جۇرت ونى "ءپۋتيننىڭ اسپازى" دەيدى. كەيىن پريگوجين مەن ۋتكين "ۆاگنەر" جەكە اسكەري توبىن قۇرادى. "ۆاگنەر" بەيرەسمي تۇردە كرەملدىڭ اتىنان سيرياداعى، افريكاداعى قاقتىعىستارعا، كەيىن ۋكرايناداعى سوعىسقا قاتىستى.
ۋكرايناداعى سوعىس كەزىندە "ۆاگنەر" باحمۋت ءۇشىن شايقاستى. كەيىن پريگوجين رەسەي قورعانىس ءمينيسترى مەن رەسەي اسكەرىنىڭ قولباسشىلارىن ءجيى سىناپ، تالاپتار قويا باستاعان. بۇلىكتەن سوڭ "ۆاگنەر" توبى ۋكرايناداعى سوعىسقا ارالاسۋىن توقتاتىپ، پريگوجين جۇرت كوزىنە سيرەك كورىنە باستاعان ەدى.
