Belgili jýrnalist Mihail Kozachkov "Problemalyq kreditter qory" AQ-nyń burynǵy basqarma tóraǵasy Dáýlet Baqbergenniń ustalǵanyn málimdedi. Onyń jazýynsha, eks-basshy qyzmettik ókilettigin asyra paidalandy degen kúdikke ilingen, dep habarlaidy Dalanews.kz.
Jýrnalistiń deregine súiensek, Baqbergen biraz ýaqyt buryn Astanada ustalyp, keiin Almatyǵa jetkizilgen. Qazir qylmystyq isti UQK-niń Sybailas jemqorlyqqa qarsy qyzmeti tergep jatyr. Bul bap boiynsha 7 jylǵa deiin bas bostandyǵynan aiyrý jazasy qarastyrylǵan.
Kozachkov máseleniń mánin túsindire kele, "Problemalyq kreditter qory" Qarjy ministrligine qarasty uiym ekenin atap ótti. Qordyń negizgi mindeti ekinshi deńgeili bankterden ótken problemalyq aktivterdi qabyldap, olardy qalpyna keltirip, keiin saýdaǵa shyǵarý eken.
Alaida bul qurylymnyń jumysy buǵan deiin de depýtattar men sarapshylar tarapynan synǵa ushyraǵan. Mamandar ondaǵan nysan qor qaramaǵynda bolǵanyna qaramastan, tabystyń nege mardymsyz ekenin birneshe ret kótergen.
Jýrnalist ózi shamamen alty jyl buryn qor qyzmetine qatysty shaǵyn zertteý jariialaǵanyn da eske saldy. Sol materialda Shyǵys Qazaqstan oblysyndaǵy Serebriansk beiorganikalyq óndirister zaýytynyń jaǵdaiy sóz bolǵan.
"Qor menedjerleri aýmaǵy 64 myń sharshy metr zaýytty aiyna nebári 1000 teńgege jalǵa bergen. Investor óndiristi jandandyramyn degenimen, is júzinde ǵimarattardy kommertsiialyq maqsatta qaita jalǵa berip otyrǵan", - dep jazdy Kozachkov.
Sonymen qatar jýrnalist bul iste taǵy bir nazar aýdarar jait baryn atap ótti. Onyń aitýynsha, Baqbergenniń burynǵy jetekshisi - Qarjy ministrligi tarapynan qor jumysyn qadaǵalaǵan Berik Sholpanqulov jýyrda Ulttyq bank tóraǵasynyń orynbasary qyzmetinen óz erkimen ketken.
Kozachkov osy eki oqiǵanyń ózara bailanysy bar-joǵy ázirge belgisiz ekenin aityp, bul suraqqa tergeý barysynda jaýap berilýi múmkin ekenin meńzedi.
Qazirgi ýaqytta resmi organdar tarapynan qosymsha túsinikteme jariialanǵan joq.
