Memleket basshysy «Mereili otbasy» ulttyq baiqaýynyń jeńimpazdaryn quttyqtady, - dep habarlaidy Dalanews.kz.
Otbasy kúni qarsańynda Astanada «Mereili otbasy» ulttyq baiqaýy qorytyndylanyp, jeńimpazdar marapattaldy. Saltanatty is-sharaǵa Qazaqstannyń barlyq aimaǵynan óńirlik kezeńderde jeńiske jetken otbasylar qatysty.
Memleket basshysy Qasym-Jomart Kemeluly Toqaev baiqaý jeńimpazdaryna arnaiy sálemin joldap, quttyqtaý hatyn jiberdi. Prezidenttiń jyly lebizin Senat tóraǵasy Máýlen Áshimbaev oqyp berdi.
Memleket basshysy óziniń quttyqtaý hatynda Ádiletti Qazaqstan qalyptastyrý jolynda otbasy institýtyn qoldaý mańyzdy qadam ekenin atap ótken. Sondyqtan elimizde bul baǵytqa basa mán berilip, júieli sharalar qabyldanyp jatqany da aityldy.
«Mereili otbasy» baiqaýy – ulttyq qundylyqtardy jańǵyrtýǵa jol ashatyn, ózindik dástúri bar biregei joba. Halqymyzdyń asyl qasietterin óskeleń urpaqtyń boiyna sińirý – bárimizge ortaq mindet. Osy oraida ár otbasy airyqsha ról atqarady. Elimizde adal eńbegimen kópke úlgi bolyp júrgen ónegeli áýletter az emes. Búgingi saltanatty kesh – sonyń aiqyn dáleli. Bul baiqaýdaǵy árbir otbasynyń jeńisin birligi jarasqan jurtymyzdyń mereili jetistigi dep baǵalaýǵa bolady», – delingen Prezidenttiń quttyqtaý hatynda.
Óz sózinde Máýlen Áshimbaev Memleket basshysy ultymyzdyń jańa kelbetin qalyptastyrýda otbasy institýty sheshýshi ról atqaratynyna únemi nazar aýdaryp kele jatqanyn aitty. Palata Spikeri atap ótkendei, Prezident Ulttyq quryltaidyń otyrysynda jariialaǵan «Adal adam – Adal eńbek – Adal tabys» tujyrymy el ideologiiasynyń irgetasy retinde airyqsha mańyzǵa ie.
«Prezidentimiz Qasym-Jomart Kemeluly Toqaev otbasynyń áleýetin kóterýge, ana men balany qorǵaýǵa, qoǵamda durys qundylyqtardy dáripteýge únemi basa mán berip keledi. Memleket basshysy óziniń Joldaýynda da osy máselelerge nazar aýdaryp, azamattarymyzdyń ál-aýqatyn arttyrýǵa arnalǵan kezekti áleýmettik bastamalar keshenin jariialady. Munyń bári elimizdegi ár otbasynyń ómirine oń yqpalyn tigizetini anyq», – dep, Máýlen Áshimbaev Palatanyń Memleket basshysy júktegen mindetterdi iske asyrý aiasynda atqaryp kele jatqan zańnamalyq qyzmetine toqtalyp ótti.
Sondai-aq biyl iske qosylǵan «Ulttyq qor – balalarǵa» atty aýqymdy joba jóninde jáne sonyń aiasynda eldegi 7 million balanyń qamtylǵany sóz boldy. Otbasylardy qoldaýǵa jáne áielder men balalar quqyǵyn qorǵaýǵa arnalǵan basqa da sharalardyń mańyzy aityldy.
Senat tóraǵasy baiqaý jeńimpazdaryn quttyqtai kele, adamgershilik jáne otbasylyq qundylyqtardy dáripteý isinde «Mereili otbasy» baiqaýy eleýli ról atqaratynyn aitty.
Jalpy jobaǵa bir salada uzaq jyldar boiy jumys istep kele jatqan eńbek dinastiialary, shyǵarmashyl jáne bala asyrap alǵan otbasylar, volonterler men metsenattar qatysyp jatyr. Biyl baiqaý 11-shi ret ótkizilip otyr. Baiqaýdyń óńirlik kezeńine qatysýǵa Qazaqstannyń barlyq aimaqtarynan 3 369 ótinim túskenin atap ótken jón. Baiqaý jeńimpazdaryn Mádeniet jáne aqparat ministri Aida Balaeva quttyqtady.
«Qazaqstandaǵy ár otbasy – elimizdiń tiregi, júregi. Sizderdiń baiqaýǵa belsendi qatysyp, jeńimpaz atanyp otyrǵandaryńyz men úshin qýanysh. Ár otbasy ulttyq qundylyqtardy boiyna sińirip otyrǵan balalarynyń qyzyǵyn kóre bersin!» – dedi Aida Balaeva.
«Mereili otbasy – 2024» baiqaýynda Aqmola oblysynan kelgen – Kóńbailar, Almaty oblysynan – Janbaevtar, Aqtóbe oblysynan – Nurbaevtar, Abai oblysynan Smaǵulovtar otbasy laýreat atandy.
Sondai-aq respýblikalyq mańyzy bar Astana, Almaty jáne Shymkent qalalarynyń jeńimpazdary – Ádilbaevtar, Qapyshevtar jáne Sydyqovtar otbasylary. Odan bólek, Batys Qazaqstan oblysynan – Hamzinder otbasy, Qaraǵandy oblysynan – Halabaevtar, Soltústik Qazaqstannan – Hasenovter, Atyraýdan – Syrálievter, Qostanaidan – Shýkýrovtar, Jambyldan Tańatarovtar, Jetisýdan – Álekeevter, Pavlodardan – Temirovter, Ulytaýdan – Qydyrpatshaevtar, Qyzylordadan – Bektaevtar, Mańǵystaýdan – Muqyrbaevtar, Túrkistannan – Meńlibaevtar jáne Shyǵys Qazaqstan oblysynan Qydyrhanovtar otbasy úzdik dep tanyldy.
