مەملەكەت باسشىسى «مەرەيلى وتباسى» ۇلتتىق بايقاۋىنىڭ جەڭىمپازدارىن قۇتتىقتادى، - دەپ حابارلايدى Dalanews.kz.
وتباسى كۇنى قارساڭىندا استانادا «مەرەيلى وتباسى» ۇلتتىق بايقاۋى قورىتىندىلانىپ، جەڭىمپازدار ماراپاتتالدى. سالتاناتتى ءىس-شاراعا قازاقستاننىڭ بارلىق ايماعىنان وڭىرلىك كەزەڭدەردە جەڭىسكە جەتكەن وتباسىلار قاتىستى.
مەملەكەت باسشىسى قاسىم-جومارت كەمەل ۇلى توقايەۆ بايقاۋ جەڭىمپازدارىنا ارنايى سالەمىن جولداپ، قۇتتىقتاۋ حاتىن جىبەردى. پرەزيدەنتتىڭ جىلى لەبىزىن سەنات ءتوراعاسى ماۋلەن اشىمبايەۆ وقىپ بەردى.
مەملەكەت باسشىسى ءوزىنىڭ قۇتتىقتاۋ حاتىندا ادىلەتتى قازاقستان قالىپتاستىرۋ جولىندا وتباسى ينستيتۋتىن قولداۋ ماڭىزدى قادام ەكەنىن اتاپ وتكەن. سوندىقتان ەلىمىزدە بۇل باعىتقا باسا ءمان بەرىلىپ، جۇيەلى شارالار قابىلدانىپ جاتقانى دا ايتىلدى.
«مەرەيلى وتباسى» بايقاۋى – ۇلتتىق قۇندىلىقتاردى جاڭعىرتۋعا جول اشاتىن، وزىندىك ءداستۇرى بار بىرەگەي جوبا. حالقىمىزدىڭ اسىل قاسيەتتەرىن وسكەلەڭ ۇرپاقتىڭ بويىنا ءسىڭىرۋ – بارىمىزگە ورتاق مىندەت. وسى ورايدا ءار وتباسى ايرىقشا ءرول اتقارادى. ەلىمىزدە ادال ەڭبەگىمەن كوپكە ۇلگى بولىپ جۇرگەن ونەگەلى اۋلەتتەر از ەمەس. بۇگىنگى سالتاناتتى كەش – سونىڭ ايقىن دالەلى. بۇل بايقاۋداعى ءاربىر وتباسىنىڭ جەڭىسىن بىرلىگى جاراسقان جۇرتىمىزدىڭ مەرەيلى جەتىستىگى دەپ باعالاۋعا بولادى»، – دەلىنگەن پرەزيدەنتتىڭ قۇتتىقتاۋ حاتىندا.
ءوز سوزىندە ماۋلەن اشىمبايەۆ مەملەكەت باسشىسى ۇلتىمىزدىڭ جاڭا كەلبەتىن قالىپتاستىرۋدا وتباسى ينستيتۋتى شەشۋشى ءرول اتقاراتىنىنا ۇنەمى نازار اۋدارىپ كەلە جاتقانىن ايتتى. پالاتا سپيكەرى اتاپ وتكەندەي، پرەزيدەنت ۇلتتىق قۇرىلتايدىڭ وتىرىسىندا جاريالاعان «ادال ادام – ادال ەڭبەك – ادال تابىس» تۇجىرىمى ەل يدەولوگياسىنىڭ ىرگەتاسى رەتىندە ايرىقشا ماڭىزعا يە.
«پرەزيدەنتىمىز قاسىم-جومارت كەمەل ۇلى توقايەۆ وتباسىنىڭ الەۋەتىن كوتەرۋگە، انا مەن بالانى قورعاۋعا، قوعامدا دۇرىس قۇندىلىقتاردى دارىپتەۋگە ۇنەمى باسا ءمان بەرىپ كەلەدى. مەملەكەت باسشىسى ءوزىنىڭ جولداۋىندا دا وسى ماسەلەلەرگە نازار اۋدارىپ، ازاماتتارىمىزدىڭ ءال-اۋقاتىن ارتتىرۋعا ارنالعان كەزەكتى الەۋمەتتىك باستامالار كەشەنىن جاريالادى. مۇنىڭ ءبارى ەلىمىزدەگى ءار وتباسىنىڭ ومىرىنە وڭ ىقپالىن تيگىزەتىنى انىق»، – دەپ، ماۋلەن اشىمبايەۆ پالاتانىڭ مەملەكەت باسشىسى جۇكتەگەن مىندەتتەردى ىسكە اسىرۋ اياسىندا اتقارىپ كەلە جاتقان زاڭنامالىق قىزمەتىنە توقتالىپ ءوتتى.
سونداي-اق بيىل ىسكە قوسىلعان «ۇلتتىق قور – بالالارعا» اتتى اۋقىمدى جوبا جونىندە جانە سونىڭ اياسىندا ەلدەگى 7 ميلليون بالانىڭ قامتىلعانى ءسوز بولدى. وتباسىلاردى قولداۋعا جانە ايەلدەر مەن بالالار قۇقىعىن قورعاۋعا ارنالعان باسقا دا شارالاردىڭ ماڭىزى ايتىلدى.
سەنات ءتوراعاسى بايقاۋ جەڭىمپازدارىن قۇتتىقتاي كەلە، ادامگەرشىلىك جانە وتباسىلىق قۇندىلىقتاردى دارىپتەۋ ىسىندە «مەرەيلى وتباسى» بايقاۋى ەلەۋلى ءرول اتقاراتىنىن ايتتى.
جالپى جوباعا ءبىر سالادا ۇزاق جىلدار بويى جۇمىس ىستەپ كەلە جاتقان ەڭبەك ديناستيالارى، شىعارماشىل جانە بالا اسىراپ العان وتباسىلار، ۆولونتەرلەر مەن مەسەناتتار قاتىسىپ جاتىر. بيىل بايقاۋ 11ء-شى رەت وتكىزىلىپ وتىر. بايقاۋدىڭ وڭىرلىك كەزەڭىنە قاتىسۋعا قازاقستاننىڭ بارلىق ايماقتارىنان 3 369 ءوتىنىم تۇسكەنىن اتاپ وتكەن ءجون. بايقاۋ جەڭىمپازدارىن مادەنيەت جانە اقپارات ءمينيسترى ايدا بالايەۆا قۇتتىقتادى.
«قازاقستانداعى ءار وتباسى – ەلىمىزدىڭ تىرەگى، جۇرەگى. سىزدەردىڭ بايقاۋعا بەلسەندى قاتىسىپ، جەڭىمپاز اتانىپ وتىرعاندارىڭىز مەن ءۇشىن قۋانىش. ءار وتباسى ۇلتتىق قۇندىلىقتاردى بويىنا ءسىڭىرىپ وتىرعان بالالارىنىڭ قىزىعىن كورە بەرسىن!» – دەدى ايدا بالايەۆا.
«مەرەيلى وتباسى – 2024» بايقاۋىندا اقمولا وبلىسىنان كەلگەن – كوڭبايلار، الماتى وبلىسىنان – جانبايەۆتار، اقتوبە وبلىسىنان – نۇربايەۆتار، اباي وبلىسىنان سماعۇلوۆتار وتباسى لاۋرەات اتاندى.
سونداي-اق رەسپۋبليكالىق ماڭىزى بار استانا، الماتى جانە شىمكەنت قالالارىنىڭ جەڭىمپازدارى – ادىلبايەۆتار، قاپىشيەۆتار جانە سىدىقوۆتار وتباسىلارى. ودان بولەك، باتىس قازاقستان وبلىسىنان – حامزيندەر وتباسى، قاراعاندى وبلىسىنان – حالابايەۆتار، سولتۇستىك قازاقستاننان – حاسەنوۆتەر، اتىراۋدان – سىرالييەۆتەر، قوستانايدان – شۋكۋروۆتار، جامبىلدان تاڭاتاروۆتار، جەتىسۋدان – الەكەيەۆتەر، پاۆلوداردان – تەمىروۆتەر، ۇلىتاۋدان – قىدىرپاتشايەۆتار، قىزىلوردادان – بەكتايەۆتار، ماڭعىستاۋدان – مۇقىربايەۆتار، تۇركىستاننان – مەڭلىبايەۆتار جانە شىعىس قازاقستان وبلىسىنان قىدىرحانوۆتار وتباسى ۇزدىك دەپ تانىلدى.
