Memleket basshysy Ulytaý oblysyndaǵy «Qazaqmys» korporatsiiasyna qarasty kenishte oryn alǵan qaiǵyly oqiǵaǵa bailanysty eńbek qaýipsizdigi salasynda qatań saqtalýǵa tiis jaǵdailarǵa nazar aýdardy, dep habarlaidy Dalanews.kz.
Bekitilgen talaptardyń óreskel buzylǵan faktileri bar. Nysandardyń ónerkásiptik qaýipsizdik júiesimen jabdyqtalý deńgeii óte tómen.
Kompaniialar eńbek qaýipsizdigin qamtamasyz etýge baǵyttalǵan jobalarǵa tiisti mólsherde investitsiia salmaidy. Munyń barlyǵy tehnogendi apattarǵa, jumysshylardyń qaza tabýy men jaraqat alýyna ákep soqtyrady.
Prezident qaterli óndiris oryndarynda jumys isteitin azamattardyń qaýipsizdigin qamtamasyz etý boiynsha Úkimetke tómendegidei sharalar qabyldaýdy tapsyrdy:
- Nysandarda ónerkásiptik qaýipsizdik normalarynyń saqtalýyna qatysty tekserý júrgizý;
- Atalǵan nysandarǵa zamanaýi qaýipsizdik júiesin, sonyń ishinde gaz belgi berý qurylǵylaryn, seismikalyq qondyrǵylaryn, pozitsionirleý júiesin jáne taǵy basqa tiisti ádis-tásilderdi ázirleý men engizý;
- Boljaý men qulaqtandyrýdyń avtomattandyrylǵan júiesin engize otyryp, nysandardy tsifrlandyrý;
- Tekserý qorytyndysy boiynsha jer qoinaýyn paidalanýshylardyń jumys baǵdarlamalaryna túzetýler engizip, zamanaýi ónerkásiptik qaýipsizdik júiesine salynatyn investitsiia kólemin ulǵaitý jolyn qarastyrý;
- Ónerkásiptik qaýipsizdik salasyndaǵy baqylaý men qadaǵalaý tetikterin qatańdatý.
Memleket basshysynyń bul tapsyrmalaryn Prezident Ákimshiligi erekshe baqylaýda ustaidy.
