Memleket basshysy Qasym-Jomart Toqaev quqyq qorǵaý organdarynyń keńeitilgen alqa májilisinde sóz sóiledi, dep habarlaidy Dalanews.kz.
Memleket basshysy sońǵy jyldary elimizde barlyq salada aýqymdy reformalar jasalyp jatqanyn atap ótti.
"Memlekettiń saiasi júiesi men ekonomikalyq qurylymy túbegeili jańǵyrýda. El ishinde joǵary quqyqtyq mádeniet qalyptasyp keledi. Azamattyq jaýapkershilik ideologiiasy berik ornyǵa bastady. Bul – bizdiń strategiialyq baǵdarymyzǵa tán asa mańyzdy basymdyq. Memleket quqyq qorǵaý júiesin jetildirýge jáne barlyq salada zań men tártip ornatýǵa basa mán beredi. Osy baǵytta naqty nátijege qol jetkizdik.
2019 jyldan beri qylmystyq quqyqbuzýshylyq sany shamamen eki ese azaidy. Sonyń ishinde qaraqshylyq, tonaý, urlyq pen buzaqylyq deńgeii 4 ese tómendedi, al kisi óltirýge qatysty qylmystar 30 paiyzǵa kemidi. Qoǵamdyq oryndardaǵy qylmys sany 80 paiyzǵa azaidy. Bul – azamattarymyz kóshede eshteńeden qaýiptenbei, alańsyz júre alady degen sóz", - deidi prezident.
Prezident Qasym-Jomart Toqaevtyń sózinshe,kelesi mańyzdy mindettiń biri – otbasylyq zorlyq-zombylyqpen kúres jáne áielder men balalardy qorǵaý.
"Osy baǵytta zańnamalyq, institýtsionaldyq turǵydan batyl qadamdar jasalýda. Otbasylyq zorlyq-zombylyq jasaǵany úshin beriletin jaza edáýir kúsheitildi. Bir jyl buryn tiisti zań qabyldandy. Zańǵa engizilgen túzetýler men basqa da sharalar naqty nátije bere bastady. Ortasha jáne aýyr deńgeidegi otbasylyq-turmystyq qylmys sany jyl basynan beri 30 paiyzǵa tómendedi. Jalpy, sońǵy 5 jylda áielderge qatysty quqyq buzýshylyqtar eki ese azaidy. Eń bastysy, qazir qoǵamdyq sana túbegeili ózgerip jatyr. Azamattarymyzdyń boiynda otbasyndaǵy qatigezdik pen ozbyrlyqqa múldem tózbeýshilik qasieti qalyptasýda.
Zardap shekkenderge qol ushyn beretin, al quqyq buzýshylardy jazǵyratyn qaiyrymdy qoǵam ornyǵyp keledi. Elimizde «Qazaqstan balalary» atty arnaiy baǵdarlama ázirlenip jatyr. Qujatta óskeleń urpaqtyń múddesin qorǵaýǵa arnalǵan mańyzdy tetikter usynylmaq. Nashaqorlyq pen esirtki biznesine qarsy keshendi jumys atqarylýda. Biyldyń ózinde 83 esirtki zerthanasy joiylyp, ainalymnan alynǵan esirtki zattarynyń kólemi 84 paiyzǵa ulǵaidy. Esirtki óndirgeni úshin beriletin jaza qatańdatyldy. Tipti, ómir boiy bas bostandyǵynan aiyrylýy múmkin", - deidi Prezident.
Biraq bul saladaǵy jumys áli de tolyǵymen bitken joq, túitkilder jetkilikti, sheshilmegen máseleler elimizdiń qaýipsizdigine, turaqtylyǵyna syn-qater tóndirýde.
"Búkil qoǵamdy alańdatyp otyrǵan eń qaýipti úrdis: jastar nashaqorlyqqa úiir bola bastady. Bul – úlken qater, ony jasyrmaýymyz kerek. Qazaqstanda kiristi jylystatýǵa jáne terrorizmdi qarjylandyrýǵa qarsy kúrestiń halyqaralyq ozyq standarttarǵa sai tiimdi júiesi qalyptasty. 2019 jyldan beri JIÓ-degi kóleńkeli ekonomikanyń úlesi 23 paiyzdan 16 paiyzǵa deiin tómendedi. Biraq áli joǵary deńgei saqtalyp otyr. Memleket jaýapkershiligi mol ári adal kásipkerlerdi qorǵap, qoldaý bildiredi. Meniń arnaiy tapsyrmam boiynsha Bas prokýratýra jalpy somasy 34 trillion teńge bolatyn sheteldikterdiń qatysy bar júzdegen infraqurylymdyq jobaǵa quqyqtyq turǵydan kómek kórsetip keledi. Alaida otandyq biznesti negizsiz qylmystyq qýdalaý máselesi tolyq sheshimin tapqan joq. Bas prokýratýra bul jumysty jalǵastyrǵany jón", - deidi Memleket basshysy.
