مەملەكەت باسشىسى قاسىم-جومارت توقايەۆ قۇقىق قورعاۋ ورگاندارىنىڭ كەڭەيتىلگەن القا ماجىلىسىندە ءسوز سويلەدى، دەپ حابارلايدى Dalanews.kz.
مەملەكەت باسشىسى سوڭعى جىلدارى ەلىمىزدە بارلىق سالادا اۋقىمدى رەفورمالار جاسالىپ جاتقانىن اتاپ ءوتتى.
"مەملەكەتتىڭ ساياسي جۇيەسى مەن ەكونوميكالىق قۇرىلىمى تۇبەگەيلى جاڭعىرۋدا. ەل ىشىندە جوعارى قۇقىقتىق مادەنيەت قالىپتاسىپ كەلەدى. ازاماتتىق جاۋاپكەرشىلىك يدەولوگياسى بەرىك ورنىعا باستادى. بۇل – ءبىزدىڭ ستراتەگيالىق باعدارىمىزعا ءتان اسا ماڭىزدى باسىمدىق. مەملەكەت قۇقىق قورعاۋ جۇيەسىن جەتىلدىرۋگە جانە بارلىق سالادا زاڭ مەن ءتارتىپ ورناتۋعا باسا ءمان بەرەدى. وسى باعىتتا ناقتى ناتيجەگە قول جەتكىزدىك.
2019 جىلدان بەرى قىلمىستىق قۇقىقبۇزۋشىلىق سانى شامامەن ەكى ەسە ازايدى. سونىڭ ىشىندە قاراقشىلىق، توناۋ، ۇرلىق پەن بۇزاقىلىق دەڭگەيى 4 ەسە تومەندەدى، ال كىسى ولتىرۋگە قاتىستى قىلمىستار 30 پايىزعا كەمىدى. قوعامدىق ورىندارداعى قىلمىس سانى 80 پايىزعا ازايدى. بۇل – ازاماتتارىمىز كوشەدە ەشتەڭەدەن قاۋىپتەنبەي، الاڭسىز جۇرە الادى دەگەن ءسوز"، - دەيدى پرەزيدەنت.
پرەزيدەنت قاسىم-جومارت توقايەۆتىڭ سوزىنشە،كەلەسى ماڭىزدى مىندەتتىڭ ءبىرى – وتباسىلىق زورلىق-زومبىلىقپەن كۇرەس جانە ايەلدەر مەن بالالاردى قورعاۋ.
"وسى باعىتتا زاڭنامالىق، ينستيتۋسيونالدىق تۇرعىدان باتىل قادامدار جاسالۋدا. وتباسىلىق زورلىق-زومبىلىق جاساعانى ءۇشىن بەرىلەتىن جازا ەداۋىر كۇشەيتىلدى. ءبىر جىل بۇرىن ءتيىستى زاڭ قابىلداندى. زاڭعا ەنگىزىلگەن تۇزەتۋلەر مەن باسقا دا شارالار ناقتى ناتيجە بەرە باستادى. ورتاشا جانە اۋىر دەڭگەيدەگى وتباسىلىق-تۇرمىستىق قىلمىس سانى جىل باسىنان بەرى 30 پايىزعا تومەندەدى. جالپى، سوڭعى 5 جىلدا ايەلدەرگە قاتىستى قۇقىق بۇزۋشىلىقتار ەكى ەسە ازايدى. ەڭ باستىسى، ءقازىر قوعامدىق سانا تۇبەگەيلى وزگەرىپ جاتىر. ازاماتتارىمىزدىڭ بويىندا وتباسىنداعى قاتىگەزدىك پەن وزبىرلىققا مۇلدەم توزبەۋشىلىك قاسيەتى قالىپتاسۋدا.
زارداپ شەككەندەرگە قول ۇشىن بەرەتىن، ال قۇقىق بۇزۋشىلاردى جازعىراتىن قايىرىمدى قوعام ورنىعىپ كەلەدى. ەلىمىزدە «قازاقستان بالالارى» اتتى ارنايى باعدارلاما ازىرلەنىپ جاتىر. قۇجاتتا وسكەلەڭ ۇرپاقتىڭ مۇددەسىن قورعاۋعا ارنالعان ماڭىزدى تەتىكتەر ۇسىنىلماق. ناشاقورلىق پەن ەسىرتكى بيزنەسىنە قارسى كەشەندى جۇمىس اتقارىلۋدا. بيىلدىڭ وزىندە 83 ەسىرتكى زەرتحاناسى جويىلىپ، اينالىمنان الىنعان ەسىرتكى زاتتارىنىڭ كولەمى 84 پايىزعا ۇلعايدى. ەسىرتكى وندىرگەنى ءۇشىن بەرىلەتىن جازا قاتاڭداتىلدى. ءتىپتى، ءومىر بويى باس بوستاندىعىنان ايىرىلۋى مۇمكىن"، - دەيدى پرەزيدەنت.
ءبىراق بۇل سالاداعى جۇمىس ءالى دە تولىعىمەن بىتكەن جوق، تۇيتكىلدەر جەتكىلىكتى، شەشىلمەگەن ماسەلەلەر ەلىمىزدىڭ قاۋىپسىزدىگىنە، تۇراقتىلىعىنا سىن-قاتەر توندىرۋدە.
"بۇكىل قوعامدى الاڭداتىپ وتىرعان ەڭ ءقاۋىپتى ءۇردىس: جاستار ناشاقورلىققا ءۇيىر بولا باستادى. بۇل – ۇلكەن قاتەر، ونى جاسىرماۋىمىز كەرەك. قازاقستاندا كىرىستى جىلىستاتۋعا جانە تەرروريزمدى قارجىلاندىرۋعا قارسى كۇرەستىڭ حالىقارالىق وزىق ستاندارتتارعا ساي ءتيىمدى جۇيەسى قالىپتاستى. 2019 جىلدان بەرى جىو-دەگى كولەڭكەلى ەكونوميكانىڭ ۇلەسى 23 پايىزدان 16 پايىزعا دەيىن تومەندەدى. ءبىراق ءالى جوعارى دەڭگەي ساقتالىپ وتىر. مەملەكەت جاۋاپكەرشىلىگى مول ءارى ادال كاسىپكەرلەردى قورعاپ، قولداۋ بىلدىرەدى. مەنىڭ ارنايى تاپسىرمام بويىنشا باس پروكۋراتۋرا جالپى سوماسى 34 تريلليون تەڭگە بولاتىن شەتەلدىكتەردىڭ قاتىسى بار جۇزدەگەن ينفراقۇرىلىمدىق جوباعا قۇقىقتىق تۇرعىدان كومەك كورسەتىپ كەلەدى. الايدا وتاندىق بيزنەستى نەگىزسىز قىلمىستىق قۋدالاۋ ماسەلەسى تولىق شەشىمىن تاپقان جوق. باس پروكۋراتۋرا بۇل جۇمىستى جالعاستىرعانى ءجون"، - دەيدى مەملەكەت باسشىسى.
