Eýraziialyq odaqqa kirýden bas tartqan Ózbekstan prezidenti Shavkat Mirziiaevtyń málimdemesin Kremldiń sózin sóileitin sarapshylar san-saqqa júgirtýde.
Saiasattanýshy Nikita Medkovich Ózbekstannyń Eýraziialyq odaqqa qosylýyna AQSh kedergi keltirdi dep esepteidi.
"Pompeo? Amerikanyń osy bir sheneýnigi shantaj jasap ketti. Tashkent osy odaqqa qosylar bolsa sazaiyn tartaryn sypaiylap jetkizdi. "Ózbekstan bul odaqty syrttai baqylasa da jetkilikti jáne "Dúniejúzilik saýda uiymy" týraly oilaǵany jón" dedi Pompeo.
Kórdińizder me? Qandai ákki, qandai qý. Týrasyn aitqanda eger Tashkent Eýraziialyq odaqqa qosylyp, Reseimen bailanys ornatar bolsa Ózbekstannyń DSU-ǵa ótýi qiyndaidy degendi eskertti", – deidi qany basyna shapqan reseilik sarapshy.
Aitýynsha AQSh Orta Aziiadaǵy ár memleketpen jeke-jeke bailanys ornatpaq. Bul Reseidiń múddesine qaishy.
Medkovich Pompeonyń Qazaqstanǵa saparynan da seziktenip otyr.
"Osy arqyly Qazaqstan men Qytaidyń arasyndaǵy biznes áriptestikti álsiretip, nazaryn ózine burmaq. Bizneste bizben bailanys ornatsańdar, utylmaisyńdar degendi astarlap aityp ketti.
Qytaidaǵy "qaita túzeý" lagerlerinen qashyp shyǵyp jatqan bosqyndardy qushaq jaia qarsy alǵandaryń durys dep Qazaqstan biliginiń qulaǵyna quiyp ketti. Vashingtonnyń piǵyly jaman. Osy arqyly Qazaqstanda Qytai jan-tánimen jek kóretin qaýymdastyq qalyptastyrmaq. Kór de turyńyz keiin AQSh osy topty óz múddesine qarai paidalanatyn bolady", – deidi saiasattanýshy.
Aitýynsha AQSh-tyń túpki maqsaty Orta Aziia elderin Qytaiǵa qarsy qoiý.
"Sizder bilmeisizder, myna men bilem. Pompeonyń saparynda áskeri áriptestik máselesi de kóterildi. Resmi jiynda sóz bolmaǵanmen, beiresmi otyrysta aitylǵany anyq. Vashington Qazaqstan jáne Ózbekstanmen Aýǵanstandaǵy ahýaldy syltaýratyp áskeri áriptestik ornatýǵa qulshynyp tur. Amerika Orta Aziiada ornalasatyn áskeri bazalar aýadai qajet. Olardyń sońǵy áskeri nysany buǵan Qyrǵyzstanda ornalasty. Bul baza 2014 jyly jabylyp, AQSh áskerleri eline oralýǵa májbúr boldy", – deidi Medkovich.
