Politsiia Free Fire oiyny arqyly jasalǵan alaiaqtyqty áshkereledi, dep habarlaidy Dalanews.kz.
Onlain oiyn balalar úshin qyzyq álem ekeni sózsiz. Alaida alaiaqtar sol virtýaldy keńistikti óz paidasyna jaratyp, senimge kirýdiń túrli ailasyn taýyp jatyr. Osyndai alaiaqtyqtyń qurbany bolǵan turǵyn Jetisai aýdandyq politsiia bólimine aryzdanyp, bank esepshotynan qarajatynyń zańsyz sheshilgenin habarlaǵan.
Jábirlenýshiniń kámeletke tolmaǵan týysy telefonnan Free Fire oiynyn oinap otyrǵan sátte oǵan beitanys azamat bailanysqa shyqqan. Oiyn barysynda kúdikti túrli ýáde berip, "bonýstar" men "utystardy" alǵa tartyp, jasóspirimnen bank kartasynyń derekteri men telefonǵa kelgen SMS-kodty surap alǵan. Sonyń saldarynan jábirlenýshiniń esepshotynan 380 myń jymqyryldy.
Jedel-izdestirý is-sharalarynyń nátijesinde 20 jastaǵy Shymkent qalasynyń turǵyny anyqtalyp, politsiia bólimine jetkizildi. Kúdiktiden alaiaqtyq áreketterge paidalanylǵan 5 telefon tárkilendi. Kiberpol qyzmetkerleri kúdiktiniń 60-tan asa jasóspirimmen oiyn arqyly bailanysqa shyǵyp, olardyń 20-dan astamynan aqsha alǵanyn anyqtady. Qazirgi ýaqytta atalǵan fakt boiynsha sotqa deiingi tergeý amaldary júrgizilip jatyr. Kúdiktiniń ózge de qylmysqa qatysy bar-joǵy anyqtalady.
