پوليتسييا Free Fire ويىنى ارقىلى جاسالعان الاياقتىقتى ەشكەرەلەدٸ, دەپ حابارلايدى Dalanews.kz.
ونلاين ويىن بالالار ٷشٸن قىزىق ەلەم ەكەنٸ سٶزسٸز. الايدا الاياقتار سول ۆيرتۋالدى كەڭٸستٸكتٸ ٶز پايداسىنا جاراتىپ, سەنٸمگە كٸرۋدٸڭ تٷرلٸ ايلاسىن تاۋىپ جاتىر. وسىنداي الاياقتىقتىڭ قۇربانى بولعان تۇرعىن جەتٸساي اۋداندىق پوليتسييا بٶلٸمٸنە ارىزدانىپ, بانك ەسەپشوتىنان قاراجاتىنىڭ زاڭسىز شەشٸلگەنٸن حابارلاعان.
جەبٸرلەنۋشٸنٸڭ كەمەلەتكە تولماعان تۋىسى تەلەفوننان Free Fire ويىنىن ويناپ وتىرعان سەتتە وعان بەيتانىس ازامات بايلانىسقا شىققان. ويىن بارىسىندا كٷدٸكتٸ تٷرلٸ ۋەدە بەرٸپ, "بونۋستار" مەن "ۇتىستاردى" العا تارتىپ, جاسٶسپٸرٸمنەن بانك كارتاسىنىڭ دەرەكتەرٸ مەن تەلەفونعا كەلگەن SMS-كودتى سۇراپ العان. سونىڭ سالدارىنان جەبٸرلەنۋشٸنٸڭ ەسەپشوتىنان 380 مىڭ جىمقىرىلدى.
جەدەل-ٸزدەستٸرۋ ٸس-شارالارىنىڭ نەتيجەسٸندە 20 جاستاعى شىمكەنت قالاسىنىڭ تۇرعىنى انىقتالىپ, پوليتسييا بٶلٸمٸنە جەتكٸزٸلدٸ. كٷدٸكتٸدەن الاياقتىق ەرەكەتتەرگە پايدالانىلعان 5 تەلەفون تەركٸلەندٸ. كيبەرپول قىزمەتكەرلەرٸ كٷدٸكتٸنٸڭ 60-تان اسا جاسٶسپٸرٸممەن ويىن ارقىلى بايلانىسقا شىعىپ, ولاردىڭ 20-دان استامىنان اقشا العانىن انىقتادى. قازٸرگٸ ۋاقىتتا اتالعان فاكت بويىنشا سوتقا دەيٸنگٸ تەرگەۋ امالدارى جٷرگٸزٸلٸپ جاتىر. كٷدٸكتٸنٸڭ ٶزگە دە قىلمىسقا قاتىسى بار-جوعى انىقتالادى.
