Almatyda segiz kún ishinde jol qozǵalysy erejelerin buzýdyń shamamen 15 myń deregi anyqtaldy, dep habarlaidy Dalanews.kz.
Politsiiany jol qaýipsizdigine tikelei áser etetin óreskel quqyqbuzýshylyqtar alańdatyp otyr. Atap aitqanda, kólikti mas kúide basqarý, qarsy baǵytqa shyǵý, sondai-aq, kólik júrgizý quqyǵynsyz kólik tizgindeý derekteri tirkelgen. Sonymen qatar, jalǵan memlekettik nómirlerdi paidalaný derekteri anyqtaldy.
4,7 myńnan asa kólik mamandandyrylǵan aiyp turaǵyna qoiylyp, memlekettik tirkeý nómirleri tárkilendi.
Almaty Politsiia departamenti bastyǵynyń orynbasary Ǵalym Sarǵulovtyń aitýynsha, baqylaý sharalary kúsheitilgenine qaramastan, joldaǵy qaýip-qater áli de saqtalyp otyr.
"Mas kúide kólik júrgizetinderge, júrgizýshi kýáliginsiz nemese jalǵan nómirmen ádeii júretinderge erekshe nazar aýdarylady. Mundai áreketter qoǵamdyq qaýipsizdikke tikelei qater tóndiredi", – dedi politsiia polkovnigi Ǵalym Sarǵulov.
Is-shara aiasynda túngi súzgileý sharalary kúsheitilip, sonyń ishinde ál-Farabi dańǵylynda baqylaý kúsheitildi. Sondai-aq, politsiianyń ózge de bólimshelerin tarta otyryp, qosymsha patrýldeý uiymdastyrylǵan.
