Búgin Petropavl qalasynda aqyn, aǵartýshy, Alash qairatkeri Maǵjan Jumabaevtyń shyǵarmashylyq murasyn nasihattaýǵa arnalǵan Maǵjan ortalyǵy saltanatty túrde ashyldy,- dep habarlaidy Dalanews.kz
Memleket basshysy Maǵjan Jumabaevty tek qazaq halqynyń ǵana emes, búkil túrki jurtynyń maqtanyshy dep atap ótti. Onyń Otanǵa degen súiispenshilikke toly jyrlary halqymyzdyń rýhani qazynasynyń altyn qoryna engenin erekshe aitty.
Jańa ortalyq – ǵylymi zertteýler, mádeni-aǵartýshylyq jobalar men shyǵarmashylyq bastamalar júzege asatyn zamanaýi intellektýaldyq alań bolmaq. Bul — aqynnyń bai murasyn tanyp-bilý jáne keńinen nasihattaý jolyndaǵy mańyzdy qadam.
Saltanatty is-sharaǵa Premer-ministrdiń orynbasary Ermek Kósherbaev, Ǵylym jáne joǵary bilim ministri Saiasat Nurbek, Halyqaralyq túrki mádenieti jáne murasy qorynyń basshylyǵy, metsenattar, aqynnyń urpaqtary men ziialy qaýym ókilderi qatysty.
Maǵjan ortalyǵynyń ashylýy – rýhani qundylyqtardy saqtaý, ulttyq mádeni biregeilikti nyǵaitý jáne Qazaqstannyń túrki álemindegi rýhani-mádeni ortalyq retindegi rólin arttyrýǵa baǵyttalǵan mańyzdy oqiǵa sanalady.
