Senat depýtaty, Aqparat jáne qoǵamdyq damý mınıstrliginiń burynǵy basshysy Darhan Qydyráli Biz Birgemiz Kazakhstan qorynyń basshysy Perızat Qaırat óziniń keńesshisi bolǵanyn joqqa shyǵardy. Bul týraly jýrnalıser depýtattyń ózinen suraǵan, - dep habarlaıdy Dalanews.kz Ulysmedia.kz-ke siltep.
BAQ ókili senatordan Biz Birgemiz Kazakhstan qorynyń basshysy Perızat Qaıratqa qatysty suraq qoımaq boldy. Óıtkeni buǵan deıin derekkózder Perızat Qaırat Darhan Qydyráliniń keńesshisi bolyp jumys istegenin jazǵan. Alaıda senator muny úzildi-kesildi joqqa shyǵardy.
«Mende jumys istegen joq. Keńesshi bolǵan joq. Mende ondaı buıryq joq», – dedi Qydyráli.
Aıta keteıik, QMA eriktiler qozǵalysynyń belsendisi jáne qoǵamdyq qaıyrymdylyq qorynyń quryltaıshysy Perızat Qaıratqa qatysty tergeý júrgizip jatyr.
«Ol kóktemgi sý tasqynynan zardap shekken azamattarǵa kómektesý úshin jınalǵan 1,5 mlrd teńgeden astam qarajatty jymqyrdy degen kúdikke ilindi», — dep habarlady agenttik buǵan deıin.
Málimetke súıensek, qaıyrymdylyqtyń negizgi bóligi qymbat sán buıymdary men jyljymaıtyn múlikti satyp alý maqsatyna jumsalǵan.
«Bıyl kóktemde ol elordadaǵy avtosalondarda 88 mln teńgege «Mercedes-Benz S450», 80 mln teńgege «Lexus LX-600» jáne 39 mln teńgege «Haval» avtokólikterin satyp aldy. Osy kezeńde ol jalpy somasy 600 mln teńgeni quraıtyn elordanyń premıým sanattaǵy «Akbulak Riviera», «Highvill Ishim Gold», «Kók Jaılaý» TK (turaq oryndaryn qosa alǵanda), sondaı-aq «Vela Village» kotej qalashyǵynda jyljymaıtyn múlik nysandaryn satyp aldy.
Sonymen qatar, qazaqstandyqtardyń qaıyrymdylyqqa jibergen qarajat esebinen Perızat Q. Dýbaı, Doha, London jáne Stambýldaǵy «St. Regis», «Shangri-La», «Palazzo Versace» jáne «Kempinski» sıaqty bes juldyzdy qonaq úılerde demalǵan. Bul elderde ol «Cartier» jáne «Louis Vuitton» sıaqty brendterdiń qymbat aksesýarlary men zergerlik buıymdardy satyp alyp, feshenebeldi meıramhanalarǵa baryp, ıahtalardy jaldaǵan. Qylmystyq shemany júzege asyrý úshin dostary men týystaryna 8% syıaqy berip, qordyń aqshasy qolma-qol aqshaǵa aınaldyryp otyrǵan.
Osylaısha, Perızat Q. óziniń zańsyz áreketterimen eriktiler qozǵalysynyń bedeline nuqsan keltirip, onyń ashyqtyq pen adaldyq prınsıpterine kúmán keltirdi jáne halyqtyń senip tapsyrǵan qarajatyn talan-tarajǵa salǵan», — dep jazylǵan agenttik málimetinde.
Artynsha QMA onyń zańsyz áreketiniń taǵy bir epızody anyqtalǵanyn habarlady.
«2023 jyldyń qarasha aıynda Perızat Qaırat Palestına turǵyndaryna gýmanıtarlyq kómek kórsetý úshin qarajat jınaýdy uıymdastyrdy. 2023 jylǵy jeltoqsanda osy aqsha esebinen Perızat Q. «Sensata Plaza» elıtalyq kesheninen 49 mln teńgege úsh bólmeli páter jáne 30 mln teńgege «Mercedes-Benz EQE 500 4 Matic» jańa avtokóligin satyp aldy. Sonymen qatar, qarajattyń bir bóligi BAÁ—de «Rolex», «Prada» jáne «Fendi» brendtik býtıkterinen zergerlik buıymdardy, saǵattar men kıimderdi satyp alýǵa jumsaldy», — dep jazylǵan habarlamada.
