Pavlodarda qylmys áleminiń serkesi ustaldy, - dep habarlaidy Dalanews.kz.
Pavlodar oblysy boiynsha Ekonomikalyq tergeý departamentiniń málimetinshe, 4 qarashada Pavlodardyń iri ónerkásiptik kásiporyndarynyń birin reiderlik basyp aldy degen kúdikpen qylmys áleminiń serkesi ustaldy.
Keltirilgen shyǵyn mólsheri milliard teńgeden asady.
"Jeke jáne zańdy tulǵalardyń jyljymaly jáne jyljymaityn múlkin reiderlik basyp alýdyń ózge de faktileri anyqtalyp jatyr", - delingen habarlamada.
Qazirgi ýaqytta reiderlik jasady degen kúdikti eki aiǵa qamaýǵa alynǵan.
Aita keteiik, buǵan deiin elimizde jasalǵan reiderlik shabýyldar áshkere bolǵan edi. Onyń ishinde eks-prezident Nazarbaevpen bailanysty adamdar bar.
Mysaly Bas prokýratýra Áliia Nazarbaeva men Valentina Rogovany reiderlik shabýyl jasady degen kásipkerdiń aryzyn Qarjylyq monitoring agenttigine jibergen bolatyn.
Bul aqparatty Bas prokýratýra Tengrinews.kz-ke rastaǵan.
"2024 jylǵy 4 naýryzdaǵy aryz Bas prokýratýranyń aqparattyq kitabyna tirkelip, protsessýaldyq sheshim qabyldaý úshin Qarjy monitoringi agenttigine (QBM) joldanǵanyn habarlaimyz", - delingen habarlamada.
Aita keteiik, 28 aqpanda baspasóz máslihaty ótip, onda eks prezidenttiń kishi qyzy Áliia Nazarbaeva men zańger Valentina Rogova 2003 jyly reiderlik shabýyl jasap, "TPK Aziia" JShS-in kásipkerden tartyp alǵany belgili boldy. Kompaniia quramynda 7 munai bazasy jáne 96 janarmai beketi bolǵan. Kásiptiń quny 170 million dollar. Zardap shekken kásipkerler Medgat Qaliev men Nurlan Bimýrzin Áliia Nazarbaeva olardyń kásibin qalai tartyp alǵanyn áńgimelep bergen bolatyn.
Kásipker Medgat Qalievtiń sózinshe, ol "TPK Aziia" kompaniiasyn Nurlan Bimýrzinniń ákesimen ashqan. Bastapqyda kásip shaǵyn bolǵanymen, ýaqyt óte kele ulǵaia bastaǵan. 2003 jylǵa qarai kompaniiada 7 munai bazasy men 96 janarmai quiý beketi bolǵan. Osylaisha úsh jyldyń ishinde belgili bir júiemen jumys isteitin kompaniia paida bolǵan.
Biraq kompaniiaǵa 2002 jyldardyń ózinde Áliia Nazarbaevanyń kózi túse bastaǵan.Bastapqyda 21 jastaǵy Áliia kásipkerlerden 50 paiyz úlesin surap, keiinnen "barlyq úlesti maǵan berińder" dep aitqan.
Sonymen qatar, Bolat Nazarbaevtyń oń qoly bolǵan Eldos Qospaevtyń isi jabyq rejimde qaraldy. Ol reiderlik jasap, adam urlap, qylmystyq top qurǵan jáne jalǵan qujattar jasaǵan dep aiyptalyp otyr.
