پاۆلوداردا قىلمىس الەمىنىڭ سەركەسى ۇستالدى، - دەپ حابارلايدى Dalanews.kz.
پاۆلودار وبلىسى بويىنشا ەكونوميكالىق تەرگەۋ دەپارتامەنتىنىڭ مالىمەتىنشە، 4 قاراشادا پاۆلوداردىڭ ءىرى ونەركاسىپتىك كاسىپورىندارىنىڭ ءبىرىن رەيدەرلىك باسىپ الدى دەگەن كۇدىكپەن قىلمىس الەمىنىڭ سەركەسى ۇستالدى.
كەلتىرىلگەن شىعىن مولشەرى ميلليارد تەڭگەدەن اسادى.
"جەكە جانە زاڭدى تۇلعالاردىڭ جىلجىمالى جانە جىلجىمايتىن مۇلكىن رەيدەرلىك باسىپ الۋدىڭ وزگە دە فاكتىلەرى انىقتالىپ جاتىر"، - دەلىنگەن حابارلامادا.
قازىرگى ۋاقىتتا رەيدەرلىك جاسادى دەگەن كۇدىكتى ەكى ايعا قاماۋعا الىنعان.
ايتا كەتەيىك، بۇعان دەيىن ەلىمىزدە جاسالعان رەيدەرلىك شابۋىلدار اشكەرە بولعان ەدى. ونىڭ ىشىندە ەكس-پرەزيدەنت نازاربايەۆپەن بايلانىستى ادامدار بار.
مىسالى باس پروكۋراتۋرا ءاليا نازاربايەۆا مەن ۆالەنتينا روگوۆانى رەيدەرلىك شابۋىل جاسادى دەگەن كاسىپكەردىڭ ارىزىن قارجىلىق مونيتورينگ اگەنتتىگىنە جىبەرگەن بولاتىن.
بۇل اقپاراتتى باس پروكۋراتۋرا Tengrinews.kz-كە راستاعان.
"2024 جىلعى 4 ناۋرىزداعى ارىز باس پروكۋراتۋرانىڭ اقپاراتتىق كىتابىنا تىركەلىپ، پروسەسسۋالدىق شەشىم قابىلداۋ ءۇشىن قارجى مونيتورينگى اگەنتتىگىنە (قبم) جولدانعانىن حابارلايمىز"، - دەلىنگەن حابارلامادا.
ايتا كەتەيىك، 28 اقپاندا باسپا ءسوز ءماسليحاتى ءوتىپ، وندا ەكس پرەزيدەنتتىڭ كىشى قىزى ءاليا نازاربايەۆا مەن زاڭگەر ۆالەنتينا روگوۆا 2003 جىلى رەيدەرلىك شابۋىل جاساپ، "تپك ازيا" ءجشس-ىن كاسىپكەردەن تارتىپ العانى بەلگىلى بولدى. كومپانيا قۇرامىندا 7 مۇناي بازاسى جانە 96 جانارماي بەكەتى بولعان. كاسىپتىڭ قۇنى 170 ميلليون دوللار. زارداپ شەككەن كاسىپكەرلەر مەدگات قالييەۆ مەن نۇرلان بيمۋرزين ءاليا نازاربايەۆا ولاردىڭ كاسىبىن قالاي تارتىپ العانىن اڭگىمەلەپ بەرگەن بولاتىن.
كاسىپكەر مەدگات قالييەۆتىڭ سوزىنشە، ول "تپك ازيا" كومپانياسىن نۇرلان ءبيمۋرزيننىڭ اكەسىمەن اشقان. باستاپقىدا كاسىپ شاعىن بولعانىمەن، ۋاقىت وتە كەلە ۇلعايا باستاعان. 2003 جىلعا قاراي كومپانيادا 7 مۇناي بازاسى مەن 96 جانارماي قۇيۋ بەكەتى بولعان. وسىلايشا ءۇش جىلدىڭ ىشىندە بەلگىلى ءبىر جۇيەمەن جۇمىس ىستەيتىن كومپانيا پايدا بولعان.
ءبىراق كومپانياعا 2002 جىلداردىڭ وزىندە ءاليا نازاربايەۆانىڭ كوزى تۇسە باستاعان.باستاپقىدا 21 جاستاعى ءاليا كاسىپكەرلەردەن 50 پايىز ۇلەسىن سۇراپ، كەيىننەن "بارلىق ۇلەستى ماعان بەرىڭدەر" دەپ ايتقان.
سونىمەن قاتار، بولات نازاربايەۆتىڭ وڭ قولى بولعان ەلدوس قوسپايەۆتىڭ ءىسى جابىق رەجيمدە قارالدى. ول رەيدەرلىك جاساپ، ادام ۇرلاپ، قىلمىستىق توپ قۇرعان جانە جالعان قۇجاتتار جاساعان دەپ ايىپتالىپ وتىر.
