Pavlodarda 9 tilde erkin sóileitin oqýshy bar. 11-synyp oqýshysy shet tilin úirengisi keletinderge dáris beredi. Jastaiynan birneshe til úirenýge degen qarym-qabileti ony qazirdiń ózinde úlken tabysqa keneltken. Aihanym Oqasova óz eńbeginiń nátijesinde Astanadan baspana satyp alǵan, dep habarlaidy Dalanews.kz "Jetinshi arnaǵa" siltep.
Til úirenýge degen qyzyǵýshylyq Aihanym Oqasovaǵa anasynan daryǵan. Ol áýeli qazaq tilin jetildirip, keiin aǵylshyn tiline den qoiǵan. Al ýaqyt óte kele frantsýz ánderine áýestenip, osy tilge erekshe súiispenshilik tanytqan.
"Frantsýz tilinen keiin Pavlodar qalasyndaǵy Jastar resýrs ortalyǵynda korei tili boiynsha tegin kýrstar ashyldy. Keiin kýrs aiaqtalsa da, bul tilge degen qyzyǵýshylyǵym basylǵan joq. Korei tilin jaqsy deńgeide meńgergennen keiin arab tilin úirene bastadym, al arab tilinen soń qytai tiline kóshtim. Qazir túrik jáne nemis tilderinde de erkin sóilei alamyn", - dedi ol.
Aihanym Oqasova shet tilderin meńgerýdi 6-synyptan bastaǵan. Ol tilderdi óz betinshe oqýlyqtar, beinesabaqtar jáne tikelei qarym-qatynas arqyly úirengen.
Poliglot bolashaqta bedeldi shetel ýniversitetine oqýǵa túsip, jer jahandy aralaýdy armandaidy.
