Jańa qoǵamdyq kólikterdiń tanystyrylymy «El astanasy - Nur-Sultan» merekelik is-sharalar sheńberinde ótti. Pavlodarǵa birinshi klassty, syıymdylyǵy úlken elektrobýstar keldi.
Sonymen qatar, «№1 avtobýs parki» JSHS 20 «Ankaı» markaly dızel otynymen júretin avtobýstarǵa ıe boldy. Nátıjesinde qalalyq avtobýs parki 76 paıyzǵa jańardy. Bul Qazaqstan boıynsha orta kórsetkishten joǵary. Jańa qoǵamdyq kólikter №5, 10, 21, 22 baǵyttaryndaǵy qalalyq marshrýttarda, sondaı-aq, oblys ortalyǵynyń aýyldyq aımaqtarynyń arasyndaǵy marshrýttarǵa qyzmet kórsetetin bolady.
- Pavlodarlyq elektrobýs – oblystaǵy qoǵamdyq qalalyq kólikti damytý salasyndaǵy iri joba, - dep atap ótti oblys ákimi. – Bári de el ıgiligi úshin. Elektrobýstar qala turǵyndarynyń qozǵalysyn jaıly etip qana qoımaı, qoǵamdyq kólikti damytýdyń jańa draıverine aınalady. Elektrobýstar qatty dybyssyz júredi ári aýaǵa taralatyn zıandy qaldyqtar shyǵarmaıdy.
Pavlodar oblysynyń ákimi Bolat Baqaýov elektrobýstardyń birin júrgizip kórdi. Ol rúlge ózi otyryp, qala ishimen júrdi. Elektrobýstar 2013-20 jyldarǵa arnalǵan Qazaqstan Respýblıkasynyń «jasyl ekonomıkaǵa» kóshý Konsepsıasyn júzege asyrý sheńberinde satyp alyndy.
- Avtobýstar men elektrobýstarda jolaýshylardyń jaılylyǵy úshin, ásirese, múmkindigi shekteýli jandar úshin barlyq jaǵdaı jasalǵan, - dedi «Báıterek» holdıńiniń basshysy Aıdar Áriphanov. – Elimizde birneshe kásiporyn elektrobýstardy jasap shyǵarýmen aınalysady.
Zamanaýı otandyq kólikterdiń Pavlodarǵa kelgeni bárimizdi de qýantyp otyr.
Sonymen qatar, Pavlodarǵa 4 jańa tramvaı jetkizildi. Tramvaı basqarmasynyń kólikterin jańǵyrtý sheńberinde qyrkúıek aıynda belorýstyq «BelKommýnMash» zaýytynda qurastyrylǵan taǵy da 5 vagon ákelinýi kerek. Nátıjesinde tramvaı deposynyń qozǵalmaly quramy 40%-ǵa jańarady.
https://youtu.be/ALo67TCKAr0
