جاڭا قوعامدىق كولىكتەردىڭ تانىستىرىلىمى «ەل استاناسى - نۇر-سۇلتان» مەرەكەلىك ءىس-شارالار شەڭبەرىندە ءوتتى. پاۆلودارعا ءبىرىنشى كلاسستى، سىيىمدىلىعى ۇلكەن ەلەكتروبۋستار كەلدى.
سونىمەن قاتار، «№1 اۆتوبۋس پاركى» ج ش س 20 «انكاي» ماركالى ديزەل وتىنىمەن جۇرەتىن اۆتوبۋستارعا يە بولدى. ناتيجەسىندە قالالىق اۆتوبۋس پاركى 76 پايىزعا جاڭاردى. بۇل قازاقستان بويىنشا ورتا كورسەتكىشتەن جوعارى. جاڭا قوعامدىق كولىكتەر №5، 10، 21، 22 باعىتتارىنداعى قالالىق مارشرۋتتاردا، سونداي-اق، وبلىس ورتالىعىنىڭ اۋىلدىق ايماقتارىنىڭ اراسىنداعى مارشرۋتتارعا قىزمەت كورسەتەتىن بولادى.
- پاۆلودارلىق ەلەكتروبۋس – وبلىستاعى قوعامدىق قالالىق كولىكتى دامىتۋ سالاسىنداعى ءىرى جوبا، - دەپ اتاپ ءوتتى وبلىس اكىمى. – ءبارى دە ەل يگىلىگى ءۇشىن. ەلەكتروبۋستار قالا تۇرعىندارىنىڭ قوزعالىسىن جايلى ەتىپ قانا قويماي، قوعامدىق كولىكتى دامىتۋدىڭ جاڭا درايۆەرىنە اينالادى. ەلەكتروبۋستار قاتتى دىبىسسىز جۇرەدى ءارى اۋاعا تارالاتىن زياندى قالدىقتار شىعارمايدى.
پاۆلودار وبلىسىنىڭ اكىمى بولات باقاۋوۆ ەلەكتروبۋستاردىڭ ءبىرىن جۇرگىزىپ كوردى. ول رۋلگە ءوزى وتىرىپ، قالا ىشىمەن ءجۇردى. ەلەكتروبۋستار 2013-20 جىلدارعا ارنالعان قازاقستان رەسپۋبليكاسىنىڭ «جاسىل ەكونوميكاعا» كوشۋ كونسەپسياسىن جۇزەگە اسىرۋ شەڭبەرىندە ساتىپ الىندى.
- اۆتوبۋستار مەن ەلەكتروبۋستاردا جولاۋشىلاردىڭ جايلىلىعى ءۇشىن، اسىرەسە، مۇمكىندىگى شەكتەۋلى جاندار ءۇشىن بارلىق جاعداي جاسالعان، - دەدى «بايتەرەك» حولدينگىنىڭ باسشىسى ايدار ءارىپحانوۆ. – ەلىمىزدە بىرنەشە كاسىپورىن ەلەكتروبۋستاردى جاساپ شىعارۋمەن اينالىسادى.
زاماناۋي وتاندىق كولىكتەردىڭ پاۆلودارعا كەلگەنى ءبارىمىزدى دە قۋانتىپ وتىر.
سونىمەن قاتار، پاۆلودارعا 4 جاڭا ترامۆاي جەتكىزىلدى. ترامۆاي باسقارماسىنىڭ كولىكتەرىن جاڭعىرتۋ شەڭبەرىندە قىركۇيەك ايىندا بەلورۋستىق «بەلكوممۋنماش» زاۋىتىندا قۇراستىرىلعان تاعى دا 5 ۆاگون اكەلىنۋى كەرەك. ناتيجەسىندە ترامۆاي دەپوسىنىڭ قوزعالمالى قۇرامى 40%-عا جاڭارادى.
https://youtu.be/ALo67TCKAr0
