Pavlodar oblysynda jol-kólik oqıǵasy saldarynan eki júrgizýshi oqıǵa ornynda qaza taýyp, bir jolaýshy aýrýhanaǵa jetkizildi, dep habarlaıdy Dalanews.kz
Aldyn ala málimetterge sáıkes, 27 jeltoqsan kúni «Pavlodar – Omby» avtojolynyń Bobrovka aýyly mańynda Toıota Vitz markaly avtokóliktiń júrgizýshisi kóktaıǵaq jaǵdaıynda kólikti basqara almaı, qarsy qozǵalys jolaǵyna shyǵyp, Hyundai Accent avtokóligimen betpe-bet soqtyǵysqan.
Avtokólikter arnaıy aıypturaqqa qoıyldy. Oqıǵanyń mán-jaıy men sebepteri tergeý barysynda anyqtalatyn bolady.
Pavlodar oblysynyń Polısıa departamenti jol qozǵalysyna qatysýshylardy jol qozǵalysy qaǵıdalaryn qatań saqtaýǵa, belgilengen jyldamdyq rejımin asyrmaýǵa, kólik quraldarynyń tehnıkalyq jaı-kúıin baqylaýǵa jáne aýa raıy jaǵdaılaryn eskerýge shaqyrady.
