Qazaqstandyq bloger Qýandyq Maǵzamov páter, avtokólik, turmystyq tehnika jáne basqa da taýarlardy qai ýaqytta tiimdi baǵaǵa satyp alýǵa bolatynyn aitty. Ol áleýmettik jelidegi paraqshasynda ár taýarǵa suranys tómendeitin kezeńderdi atap, satyp alýdy aldyn ala josparlaýǵa keńes berdi, dep habarlaidy dalanews.kz.
Blogerdiń aitýynsha, páter satyp alýǵa qańtar aiy qolaily. Bul kezeńde jyljymaityn múlikke suranys tómendep, satýshylar baǵany túsirýge beiim bolady. Qurylys kompaniialary da túrli jeńildik pen aktsiia usynýy múmkin.
"Páterdi qańtarda satyp alǵan tiimdi. Suranys tómen bolǵandyqtan, satýshylar jeńildik jasaýǵa yqylasty bolady, al qurylys kompaniialary túrli aktsiia uiymdastyrady", – dedi Qýandyq Maǵzamov.
Al avtokólik satyp alýdy aidyń sońǵy kúnderine josparlaǵan jón. Onyń sózinshe, osy ýaqytta avtosalon menedjerleri ailyq satý josparyn oryndaýǵa tyrysatyndyqtan, klienttiń qosymsha jeńildik alý múmkindigi artady.
Áýe biletterine qatysty bloger olardy túngi ýaqytta qarastyrýǵa keńes berdi. Ol bul mezgilde izdeý suranysy azaiyp, baǵa tómendeýi múmkin ekenin aitty. Degenmen seisenbiden sársenbige qaraǵan túni bilet arzandaidy degen pikirdiń naqty rastalmaǵanyn eskertti.
"Keibireýler biletti seisenbiden sársenbige qaraǵan túni satyp alǵan tiimdi deidi. Biraq bul – rastalmaǵan aqparat", – dedi ol.
Maǵzamov maýsymdyq taýarlardy suranys azaiǵan kezde alǵan tiimdi ekenin de atap ótti. Onyń keńesine sáikes, mototsikldi jeltoqsanda, konditsionerdi qazan nemese qarasha ailarynda, al velosipedti qysta satyp alýǵa bolady. Bul kezeńderde taýardyń ózine ǵana emes, konditsioner ornatý qyzmetine de baǵa tómendeýi múmkin.
Sondai-aq mektepke qajetti qural-jabdyqtardy qarashada alǵan jón. Sebebi oqý jyly bastalǵannan keiin suranys azaiyp, dúkender qalǵan taýarlaryn jeńildikpen satady.
Bloger smartfon men noýtbýk satyp alýdyń da qolaily ýaqytyn atady. Onyń pikirinshe, iPhone-nyń burynǵy úlgileri jańa modelder tanystyrylatyn qyrkúiekten keiin, iaǵni qazan aiynda arzandaidy. Al noýtbýk alýǵa aqpan aiy tiimdi bolýy múmkin.
"Aqpanda jańajyldyq suranys báseńdeidi, al naryq kóktemde shyǵatyn jańa modelderge daiyndala bastaidy", – dep túsindirdi Qýandyq Maǵzamov.