Pashiniannyń jaiyn oilasam
Biraq, bul – salmaǵy aýyr "jeńis" bolmaq. Sebebi, biliktegi partiianyń da, parlamenttegi kópshiliktiń de ókili emes bolǵandyqtan (eger parlament sailaýyn qaita ótkizbese) onyń legitimdigine kúmán kóp bolady, al bul onsyz da silkinip turǵan qoǵamdaǵy jáne saiasi biliktegi turaqtylyqqa áser etpei qoimaidy.
Degenmen, mańyzdysy ol emes.
Kútpegen jerden halyqtyń bilikke degen senimsizdigi men ashý-yzasynyń jiyntyq simvolyna ainalyp shyǵa kelgen oǵan armiandar «bar báleden qutqarýshy» dep úmittene qarap otyr.
Basqarý qyzmetinde bolmaǵan, "óndiriste shyńdalmaǵan" burynǵy jýrnalist Armeniia siiaqty geosaiasi qaqpanda turǵan, ekonomikasy áljýaz, sheteldegi diasporaǵa kúni qarap otyrǵan ári kórshisimen áne-mine soǵysýǵa shaq turǵan elde jaǵdaidy odan saiyn ýshyqtyryp jibere me dep qorqamyn.
Maǵan ol Elchibei men Gamsahýrdiadan da nashar basshy bolatyn siiaqty kórinedi.
«Túrli-tústi tóńkeristerdiń» arqasynda bilikke kelgen Iýshenko, Saakashvili, Poroshenkolardyń tym bolmasa geosaiasi manevr jasaýǵa múmkindikteri boldy, úlken derjavalardyń ol elderde múddeleri kóbirek.
Tek Reseige jáne Iranǵa kúni qarap otyrǵan Armeniia olardan ketip qaida baratynyn túsinbeimin.
AQSh úshin de, tipti Eýropa úshin de Armeniia – bas qatyratyn úlken sharýa emes (Armian lobbii azdap yqpal etpese). Osyndai jaǵdaida halyqtyń talaptaryn oryndai almaǵan Pashiniannan jurttyń tez kóńili qalady. Kóńili qalyp qana qoisa jaqsy. Elde turaqsyzdyq bastalsa, Ázerbaijan Qarabaq daýyn qaita qozǵaýy múmkin.
Muhtar Seńigrbai, jýrnalist, sarapshy.
https://dalanews.kz/17365
