2026 jyldyń qyrkúieginde Ulttyq qaýipsizdik komitetiniń Shekara qyzmeti shekara keńistiginde zań buzǵan 4 138 adamdy ustady. Sondai-aq jalpy quny 2,5 mlrd teńgeden asatyn taýarlar men júkterdi zańsyz ótkizýdiń 1 598 deregi anyqtaldy, dep habarlaidy dalanews.kz.
UQK málimetinshe, ustalǵandardyń 3 502-si shetel azamattary.
Shekaralyq baqylaý kezinde esirtki zattaryn zańsyz alyp ótýdiń 37, qarý-jaraq pen oq-dári tasymaldaýdyń 62 deregine tosqaýyl qoiyldy. Tekserý barysynda eki travmatikalyq jáne eki gazdy qarý, sondai-aq 77 dana oq-dári tárkilendi.
Zań buzýshylyqtardyń basym bóligi janar-jaǵarmaiǵa qatysty boldy. Bir aida jalpy kólemi 80 tonnadan asatyn, quny 24,1 mln teńgege baǵalanǵan janar-jaǵarmaidy zańsyz tasymaldaýdyń 816 deregi tirkeldi.
Budan bólek, quny 1,3 mlrd teńgeden asatyn halyq tutynatyn taýarlardy zańsyz ótkizýdiń 549 deregi anyqtaldy. Sondai-aq 1,2 mlrd teńgeden astam valiýtany shekaradan alyp ótýdiń 134 áreketine jol berilmedi.
Shekarashylar Kaspii teńizindegi brakonerlikpen kúres aiasynda zańsyz balyq aýlaýdyń 48 deregin toqtatty. Nátijesinde 41,7 shaqyrym aýlaý quraly jáne jalpy salmaǵy 840 keli bolatyn 145 bekire tuqymdas balyq tárkilendi. Aldyn alynǵan shyǵyn kólemi 350 mln teńgeden asty.
Anyqtalǵan zań buzýshylyqtar boiynsha 66 qylmystyq is qozǵalyp, tergeý amaldary júrgizilip jatyr. Sonymen qatar 3 607 ákimshilik is qaralýda. Osy ister aiasynda jalpy somasy 34 mln teńgeden asatyn aiyppul salyndy.
Qalǵan derekterge qatysty materialdar tiisti protsessýaldyq sheshim qabyldaý úshin quqyq qorǵaý jáne sot organdaryna joldandy.
Aita keteiik, 2026 jyldyń shildesinde Shekara qyzmeti 2,1 mlrd teńgeden astam shetel valiýtasyn zańsyz alyp ótýdiń 149 deregin anyqtaǵan edi. Sol aida jalpy quny 3,9 mlrd teńgeden asatyn taýarlar men júkterdi zańsyz tasymaldaýdyń 2 476 áreketine tosqaýyl qoiyldy.
Al tamyzda shekara keńistiginde zań buzǵan 5 588 adam ustaldy. Olardyń 4 907-si shetel azamaty bolǵan.
