Quryltai depýtaty Meiirhat Qasymbaev Qazaqstandaǵy eń tómengi jalaqy mólsherine qatysty pikir bildirdi. Onyń aitýynsha, qazirgi 85 myń teńge aýyl turǵyndaryna jetkilikti bolýy múmkin, al qalada bul soma ómir súrýge jetpeidi, dep habarlaidy dalanews.kz.
Depýtat bul pikirin Tizgin.kz tilshisine bergen suhbatynda aitqan. Jýrnalist odan Qazaqstandaǵy eń tómengi jalaqy mólsheri qansha bolýy kerektigin suraǵan.
Meiirhat Qasymbaev aýyl men qaladaǵy turmys shyǵyndarynyń aiyrmashylyǵyna nazar aýdarǵan. Onyń sózinshe, aýyl turǵyndarynyń bir bóligi mal ustap, sút, kókónis jáne basqa da azyq-túlikti óz sharýashylyǵynan ala alady.
«Aýyldaǵy adamdar eńbekqor halyq qoi. Máselen, siz qalada turasyz, sizdiń baqshańyz joq. Al aýyldaǵy adamdar mal ustaidy. Tamaq ózinen, sút, kókónis óziniki. Sondyqtan 85 myń teńge aýylda turyp jatqan adamdarǵa jetedi. Eńbek etken adamǵa 85 myń jetip qalar», – dedi Meiirhat Qasymbaev.
Ol qala turǵyndary úshin mundai tabys jetkiliksiz ekenin atap ótti. Depýtattyń pikirinshe, eń tómengi jalaqy máselesin azamattyń turǵylyqty jeri men kúndelikti shyǵyndaryn eskere otyryp qarastyrý qajet.
Qazaqstanda 2026 jyly eń tómengi jalaqy 85 myń teńge bolyp belgilengen. Bul kórsetkish buǵan deiin de birneshe ret talqylanǵan. Qazir 2027–2029 jyldarǵa arnalǵan biýdjet jobasy aiasynda eń tómengi jalaqyny ózgertý máselesi de qaralyp jatyr.
Aita keteiik, buǵan deiin depýtattar men Úkimet ókilderi eń tómengi jalaqy mólsherin qaita qaraý máselesin kótergen. Birinshi vitse-ministr Azamat Ámrin tiisti esep-qisap bar ekenin, biraq túpkilikti sheshim áli qabyldanbaǵanyn aitqan.
