Ózbekstandyq tanymal bankir, Anorbank aktsioneri ári baqylaýshy keńesiniń múshesi Kahramonjon Olimov Parijdiń ortalyǵynda urlanyp, eki táýlik boiy azapqa túsken. Bul týraly frantsýzdyń Le Monde basylymyna silteme jasap Dalanews.kz habarlaidy.
Oqiǵa 23 maýsym kúni Parijdiń bedeldi sanalatyn segizinshi okrýginde bolǵan. 48 jastaǵy Olimovty belgisiz bir top jańa tanysy, ózin «Anastasiia» dep tanystyrǵan áiel arqyly kezdesýge shaqyryp, keiin ony kólikke kúshtep otyrǵyzyp, qalanyń syrtyna alyp ketken.
Bankirdiń aitýynsha, ony biik qorshaýy bar jeke úige aparǵan. Sol jerde ol óziniń burynǵy bank seriktesine jaqyn, qylmys áleminde tanymal «zańdaǵy uryny» («vor v zakone») kórgen. Bankirdi uryp-soǵyp, saýsaǵyn kesemiz dep qorqytqan jáne darǵa asý áreketin instsenirovka jasaǵan.
Osydan keiin ony Nitstsadaǵy bir villanyń jertólesine aparyp, ózbekstandyq seriktesterinen keshirim suraǵan video túsirtip, 5 million dollarǵa qolhat jazýǵa májbúrlegen. Sonymen birge Ózbekstanda turatyn óziniń kólik júrgizýshisi arqyly dereý 200 myń dollar aqsha aýdartqan.
Osydan keiin ǵana Olimovty bosatqan. Bankir birden politsiiaǵa júgingen. Frantsiia biligi uiymdasqan qylmys babymen 1 shildede Túrkiia azamatyn tutqyndaǵan.
Frantsýz jýrnalisteri anyqtaǵandai, Olimov Parijge jyljymaityn múlik satyp alý jónindegi kelisimdi aiaqtaý úshin jáne Ózbekstandaǵy EDF frantsýz energetikalyq kompaniiasymen birlesken elektr stantsiiasynyń qurylysy boiynsha kelissóz júrgizýge barǵan.
Oqiǵadan keiin meditsinalyq tekserýden ótken bankirdiń denesinde kóptegen jaraqat anyqtalǵan. Qazir ol qatty kúizeliste júrgenin, mazasyzdyq pen uiqysyzdyqqa shaldyqqanyn aitqan. Tashkentke oralǵan soń ol óz kúzetin kúsheitken.
Ózbekstandyq Anorbank banki bul oqiǵanyń banktiń qyzmetine qatysy joq ekenin málimdep, onyń tolyq jeke sipattaǵy másele ekenin jetkizdi.
Aita keterligi, buǵan deiin Tájikstanda da osyǵan uqsas aýyr qylmys jasalǵan edi. «Orienbank» tóraǵasynyń orynbasary Shýhrat Ismatýlloev urlanyp, azaptap óltirilgen. Oǵan qylmyskerler elektr togyn jáne fen paidalanǵan. Keiin onyń denesin ózenge tastaǵan. Bul iske qatysty ustalǵan uiymdasqan toptyń bir múshesi – Rýstam Ashýrov keiin Kishiniov áýejaiynda qarýly shabýyl jasap, arnaiy jasaqtyń qolynan qaza tapqan.
