وزبەكستاندىق تانىمال بانكير، Anorbank اكسيونەرى ءارى باقىلاۋشى كەڭەسىنىڭ مۇشەسى كاحرامونجون وليموۆ ءپاريجدىڭ ورتالىعىندا ۇرلانىپ، ەكى تاۋلىك بويى ازاپقا تۇسكەن. بۇل تۋرالى فرانسۋزدىڭ Le Monde باسىلىمىنا سىلتەمە جاساپ Dalanews.kz حابارلايدى.
وقيعا 23 ماۋسىم كۇنى ءپاريجدىڭ بەدەلدى سانالاتىن سەگىزىنشى وكرۋگىندە بولعان. 48 جاستاعى وليموۆتى بەلگىسىز ءبىر توپ جاڭا تانىسى، ءوزىن «اناستاسيا» دەپ تانىستىرعان ايەل ارقىلى كەزدەسۋگە شاقىرىپ، كەيىن ونى كولىككە كۇشتەپ وتىرعىزىپ، قالانىڭ سىرتىنا الىپ كەتكەن.
بانكيردىڭ ايتۋىنشا، ونى بيىك قورشاۋى بار جەكە ۇيگە اپارعان. سول جەردە ول ءوزىنىڭ بۇرىنعى بانك سەرىكتەسىنە جاقىن، قىلمىس الەمىندە تانىمال «زاڭداعى ۇرىنى» («ۆور ۆ زاكونە») كورگەن. بانكيردى ۇرىپ-سوعىپ، ساۋساعىن كەسەمىز دەپ قورقىتقان جانە دارعا اسۋ ارەكەتىن ينسەنيروۆكا جاساعان.
وسىدان كەيىن ونى نيسساداعى ءبىر ۆيللانىڭ جەرتولەسىنە اپارىپ، وزبەكستاندىق سەرىكتەستەرىنەن كەشىرىم سۇراعان ۆيدەو ءتۇسىرتىپ، 5 ميلليون دوللارعا قولحات جازۋعا ماجبۇرلەگەن. سونىمەن بىرگە وزبەكستاندا تۇراتىن ءوزىنىڭ كولىك جۇرگىزۋشىسى ارقىلى دەرەۋ 200 مىڭ دوللار اقشا اۋدارتقان.
وسىدان كەيىن عانا وليموۆتى بوساتقان. بانكير بىردەن پوليسياعا جۇگىنگەن. فرانسيا بيلىگى ۇيىمداسقان قىلمىس بابىمەن 1 شىلدەدە تۇركيا ازاماتىن تۇتقىنداعان.
فرانسۋز جۋرناليستەرى انىقتاعانداي، وليموۆ پاريجگە جىلجىمايتىن مۇلىك ساتىپ الۋ جونىندەگى كەلىسىمدى اياقتاۋ ءۇشىن جانە وزبەكستانداعى EDF فرانسۋز ەنەرگەتيكالىق كومپانياسىمەن بىرلەسكەن ەلەكتر ستانسياسىنىڭ قۇرىلىسى بويىنشا كەلىسسوز جۇرگىزۋگە بارعان.
وقيعادان كەيىن مەديسينالىق تەكسەرۋدەن وتكەن بانكيردىڭ دەنەسىندە كوپتەگەن جاراقات انىقتالعان. ءقازىر ول قاتتى كۇيزەلىستە جۇرگەنىن، مازاسىزدىق پەن ۇيقىسىزدىققا شالدىققانىن ايتقان. تاشكەنتكە ورالعان سوڭ ول ءوز كۇزەتىن كۇشەيتكەن.
وزبەكستاندىق Anorbank بانكى بۇل وقيعانىڭ بانكتىڭ قىزمەتىنە قاتىسى جوق ەكەنىن مالىمدەپ، ونىڭ تولىق جەكە سيپاتتاعى ماسەلە ەكەنىن جەتكىزدى.
ايتا كەتەرلىگى، بۇعان دەيىن تاجىكستاندا دا وسىعان ۇقساس اۋىر قىلمىس جاسالعان ەدى. «وريەنبانك» ءتوراعاسىنىڭ ورىنباسارى شۋحرات يسماتۋللويەۆ ۇرلانىپ، ازاپتاپ ولتىرىلگەن. وعان قىلمىسكەرلەر ەلەكتر توگىن جانە فەن پايدالانعان. كەيىن ونىڭ دەنەسىن وزەنگە تاستاعان. بۇل ىسكە قاتىستى ۇستالعان ۇيىمداسقان توپتىڭ ءبىر مۇشەسى – رۋستام اشۋروۆ كەيىن كيشينوۆ اۋەجايىندا قارۋلى شابۋىل جاساپ، ارنايى جاساقتىڭ قولىنان قازا تاپقان.
