Rio Olimpiadasynyń jeńimpazy, kásipqoi boks sheberi Daniiar Eleýsinov eldegi sporttyń jai-kúiine qatysty pikir bildirdi, - dep habarlaidy Dalanews.kz.
Ulttyq Olimpiada komitetin uzaq ýaqyt boiy Nazarbaevtyń kúieý balasy Timýr Qulybaev basqarǵany belgili. Daniiar Eleýsinov Qazaqstanda sport salasyn oligarhtar basqarýyna qatysty kózqarasyn aitty.
"Men óner kórsetken kezeńde Timýr Asqaruly, Daniiar Abylǵazinder boldy. Olardyń Ulttyq Olimpiada komitetinde de, IBA-da da, basqa halyqaralyq olimpiada komitetinde de ózderiniń bedeli boldy. Sebebi biz altynsyz kelmeitinbiz. Londonda, Rioda bir altynnan bolsa da, turaqty túrde kúmisi bar, qolasy bar alyp keletinbiz. Ol kezde sportshylar da talapqa sai bolýy múmkin. Serik te (Sápiev) myqty boldy.
...Ol kisilerdiń (Qulybaev, Abylǵazinderdiń - esk.) elge paidasy boldy. Beket Mahmýtovtyń istegenin eshkim qaitalaǵan joq. Timýr Asqarulynyń kezinde de barker alyndy. Kelissóz júrgizý de óte mańyzdy dep oilaimyn. Ekinshi jaǵynan julqynyp turǵan sportshy da bolýy kerek. Bir-birinsiz jumys jasamaidy", - dedi sportshy Ulysmedia-ǵa.
Daniiar Eleýsinov "din manipýliatsiia bolyp ketken joq pa?" degen saýalǵa jaýap berdi. Óitkeni keiingi kezde dinniń sportqa yqpaly qoǵamda jii sóz bolady.
"Qazir qoǵam úshke bólinip jatyr. Bir jaǵynan dindi ustanatyndar bar. Táńirshildikti qozǵaityndar bar. Batystyń yqpalyna túsip jatqan qoǵam bar. Amerikada boldym, birinshi kezekte eshkim dinine tiispeidi. Biznesińdi jasa, dami ber, salyǵyńdy tóleseń boldy. Bizde dinmen alysyp jatady. Dinnen eshqandai jamandyq kelip jatqan joq siiaqty. Buryn bir tolqyn bolǵan shyǵar. Ol - durys emes aǵymdardyń aralasyp ketken kezderi. Ol aǵymdar durys emes dep te aitýǵa bolmaidy, ol aǵymdardy durys túsinbegen adamdardyń istegen áreketterinen de bolýy múmkin. Ol jaǵy bar shyǵar (din manipýliatsiia bolyp ketti - esk.). Men kóp bile bermeimin, ózim izdenip júrgen adammyn. Islamnyń ózi nashar degen sóz emes, ony adamdar istep jatyr", - dedi ol Ulysmedia-ǵa bergen suhbatynda.
Kásipqoi boks sheberi Parij Olimpiadasyna qatysty da pikir bildirdi.
"Parij Olimpiadasynda barýym óte kesh qarastyryldy. Tyǵyz ýaqyt qalǵan kezde bir-eki aǵamyzdyń qalaýymen, sol kezdegi ministrlikti basqarǵan kisilerdiń usynysymen (qarastyryldy - esk.). Biraq 9-10 kúndei qalǵan. Ol kezde daiyndalyp úlgermeimin. Jarystarǵa shyǵýym kerek, álemdik arenadaǵy tóreshilerge qaitadan bedelimdi kórsetýim kerek dep oiladym. Oǵan ýaqyt joq. Birinshi bir kezeń júrip, jarystaryna qatysýyń kerek. Óz oiym, jeke pikirim. ...Óz-ózime senimdimin, tóreshilerge senimdi bolmadym. Bermei qoia salýy jeńil. Men oǵan deiingi Olimpiadada altynymdy búkil kezeń boiy aqtadym.
Boksshylar Olimpiada altyn almaǵannan keiin ishtei ókindim. Bokstyń qadiri túsip bara jatsa, bárimizge tiedi. Boks trendten ketip bara jatqany bárimizge yńǵaily emes", - dedi Eleýsinov Ulysmedia-ǵa bergen suhbatynda.
Aita keteiik, Daniiar Eleýsinov - qazaqstandyq kásipqoi boksshy, Qazaqstan Respýblikasynyń eńbek sińirgen sport sheberi.
2016 jyly Rio-de-Janeiroda ótken Olimpiadanyń chempiony. 2013 jylǵy áýesqoilar arasyndaǵy álem chempiony, 2010 jáne 2014 jylǵy Aziia oiyndarynyń eki dúrkin chempiony, 2013 jáne 2015 jylǵy eki dúrkin Aziia chempiony.
