Ózbekstan tólqujatynan qutylý úshin 110 dollar qajet
Aisánim Qoshpanova Qazaqstanǵa, onyń ishinde Aqtóbege 2013 jyly kóship kelgen. Sodan beri Ózbekstan men Qazaqstannyń shekarasyn tozdyrdy.
– Aqtóbege aǵamnyń izinen keldim. Ol meniń jalǵyz aǵam bolǵan soń baýyrymnan qara úzip qalǵym kelmedi. Sóitip, Ózbekstandaǵy úiimdi satyp, ata-baba jerine jalǵyz qyzymmen qonys aýdardym. Biraq, qujattarymyz ábigerge salyp, sharshatyp jiberdi. Tipti, ýaiymnan densaýlyǵym nasharlap, dáriger jaǵalap júrmin, – deidi Aisánim Qoshpanova.
Dálirek aitqanda, ol Ózbekstanda jeke kýálikpen júredi. Al Qazaqstanǵa kóshýge qujat rásimdegen kezde tólqujat alý mindetteldi. Sol pasport bolǵan kezde ǵana Qazaqstan azamattyǵyn alýǵa múmkindik bar eken.
– Azamattyq aldym, Aqtóbege kóship keldim. Qaladaǵy Elek politsiia bólimi qyzyl tústi jeke kýálikti alyp qaldy, biraq, pasport áli kúnge deiin qolymda júr. Kóshi-qon politsiiasy maǵan pasportty Almatydaǵy Ózbekstan elshiligine poshta arqyly salyp jiber dedi. Jiberdim, ol jaqtaǵy adamdar hatty ashpastan, keri qaitardy, – deidi oralman.
Aisánim Qoshpanovanyń aǵasy Esenǵali Saǵiev 2000 jyly Qazaqstanǵa qonys aýdarǵan. Ol kezde qujattardy rásimdeý ońai sharýa edi. Sońǵy kezderi shyǵyny kóp jumysqa ainaldy dep otyr ol.
– Buryn biz kóship kelgen kezde turǵan jerimiz tólqujatymyzdy birden alyp qalatyn. Qazir qoldaryna ustatyp jiberip, keiin Qazaqstanǵa tirkeledi, azamattyq alady. Sodan keiin ǵana qaita baryp, tólqujat tapsyrý kerek eken. Eki ortada júretin qarjy tapshy, zeinetaqy jetpeidi. Poshta arqyly jiberip edik, ózimizge qaita keldi. Ol úshin 110 dollar aqsha tóleýimiz kerek eken. Bizde mundai qarjy joq, – deidi E.Saǵiev.
Onyń aitýynsha, eki el arasyndaǵy kóshi-qon zańdylyqtary ózgergen tusta, Ózbekstan tarapynan qoiylatyn talaptar kúsheiip, qarapaiym adamdar qiyndyqqa tap bolyp júr. Ári-sári kúi keshken oralman el Úkimetinen kómek surap otyr.
Oralman Aisánim Qoshpanova bir ai merzimin ótkizip aldy. Eńbek, áleýmettik qorǵaý jáne kóshi-qon komitetiniń oblystyq departamenti basshysynyń orynbasary Jańyl Aimuhambetovanyń aitýynsha, zeinetker Aisánim Qoshpanova zań talaptarymen elshilikke baryp, qujatty tapsyrýy tiis eken. Al oralman qazir densaýlyǵyna bailanysty dárigerlerdi jaǵalap júr. Ol qant diabetine shaldyqqan.
– Qazir emhanada júrmin. Densaýlyǵym nasharlap ketti. Tipti, qaida baryp, kimnen kómek surarymdy bilmeimin. Oblystyq kóshi-qon politsiiasy men sekildi ábigerge túsken adamdardyń kóp ekenin aitty. Ózim zeinetaqy alamyn. Qyzymnyń ailyǵy – 30 myń teńge. Ony páteraqyǵa berip, zeinetaqyny tamaqqa jumsaimyz. Úi alýǵa kezekke turǵanymmen, arendalyq páter 68 myńǵa shyǵyp, ony tólei almaityn bolǵan soń baspanadan bas tarttym. Mende eshqandai amal qalmady, – deidi kóp júristen sharshaǵan oralman.
Altynai SAǴYNDYQOVA
