Apelliatsiialyq sot burynǵy orys pravoslav shirkeýiniń sviashennigi Iakov Vorontsovty mamandandyrylǵan psihiatriialyq mekemege ornalastyrý týraly sheshimdi ózgerissiz qaldyrdy, dep habarlaidy dalanews.kz.
Qorǵaýshy saraptama taǵaiyndaý tártibimen kelispeidi
Advokat Ǵalym Nurpeiisovtiń aitýynsha, qorǵaý tarapy tergeý psihologiialyq-psihiatriialyq saraptamany qalai taǵaiyndaǵanymen kelispeidi. Onyń sózinshe, Vorontsov bastapqyda zańmen berilgen quqyǵyn paidalanyp, saraptamadan ótýden bas tartqan. Soǵan qaramastan ony aýrýhanaǵa jetkizgen. Keiin qorǵaýyndaǵy azamat meditsinalyq mekemede de saraptamadan ótýden qaita bas tartqan.
«Soǵan qaramastan dárigerler naqty jaýap almastan óz qorytyndylaryn jasady. Onyń ústine diagnozdardyń keibiri suraq belgisimen kórsetilgen. Prokýrordyń aitýynsha, bul tergeýshige onyń jaǵdaiyn anyqtaýǵa múmkindik bermegen. Sondyqtan ony májbúrli túrde tekserýge jiberdi», – dedi advokat.
«Qorǵaný quqyǵy tolyq qamtamasyz etilmedi»
Qorǵaý tarapy kúdikti men advokattardyń tergeý sotynda óz ustanymyn tolyq qorǵaýǵa múmkindigi bolmaǵanyn aitady. Nurpeiisovtiń sózinshe, saraptama qorytyndysymen tanysqannan keiin qorǵaýshylarda, sonyń ishinde Vorontsovtyń meditsinalyq kartasyna qatysty da suraqtar týyndaǵan.
«Sot meditsina – meditsina, al zańgerler zań aiasynda áreket etýi kerek degen ustanymdy aitty. Biz adamnyń densaýlyq jaǵdaiyn anyqtai almaimyz», – dedi advokat.
Sonymen qatar qorǵaýshy tarapqa is materialdarynyń tolyq kólemi, onyń ishinde saraptamalar berilmegenin málimdedi. Osydan keiin sot prokýrorǵa qorǵaý jaǵyn barlyq qajetti materialdarmen qamtamasyz etýdi tapsyrǵan.
Advokattardyń aitýynsha, endi olar balama saraptama júrgizýdi josparlap otyr.
Vorontsov qazir Aqtastaǵy aýrýhanada jatyr
Qorǵaýshynyń málimetinshe, Iakov Vorontsov qazir Aqtastaǵy psihiatriialyq aýrýhanada qalyp otyr.
«Ózin jaqsy sezinedi jáne sálem joldap jatyr», – dedi advokat.
Vorontsov ne úshin qoǵam nazarynda júr?
Eske salaiyq, jýyrda AQSh-tyń halyqaralyq dini bostandyq jónindegi komissiiasy (USCIRF) Iakov Vorontsovty dini senimi úshin qýdalanyp jatqan adamdar tizimine engizgen bolatyn.
Vorontsov Ýkrainadaǵy soǵysty ashyq synap, Qazaqstanda Máskeýge baǵynbaityn táýelsiz avtokefaldy pravoslav shirkeýin qurý ideiasyn qoldap kelgen. Ol Qazaqstandaǵy pravoslav shirkeýiniń avtonomiiasy týraly bastamasyn 2023 jyldyń jazynda bergen suhbattarynyń birinde egjei-tegjeili túsindirgen edi.
