5 maýsymnan bastap Qazaqstanda Biryńǵai jinaqtaýshy zeinetaqy qoryndaǵy (BJZQ) jinaqty merziminen buryn paidalaný tártibi ózgeredi. Tiisti qaýlyǵa Premer-ministr Oljas Bektenov qol qoiǵan, dep habarlaidy dalanews.kz.
Jańa erejege sáikes, endi zeinetaqy jinaǵyndaǵy «jetkiliktilik shegi» jańartylǵan ádisteme boiynsha esepteledi. Sonyń nátijesinde kóptegen azamat úshin shotta saqtalýy tiis eń tómengi soma ulǵaiýy múmkin. Bul turǵyn úi satyp alýǵa, ipotekalyq qaryzdy óteýge nemese emdelýge paidalanýǵa bolatyn artyq qarajat kóleminiń azaiýyna áser etýi yqtimal.
Buǵan deiin qoldanysta bolǵan talaptar boiynsha zeinetaqy jinaǵynyń bir bóligin alý úshin ótinimderdi 4 maýsymǵa deiin berý qajet edi. Ótinimder arnaiy platforma arqyly qabyldandy.
Eńbek jáne halyqty áleýmettik qorǵaý ministri Asqarbek Ertaevtyń aitýynsha, zeinetaqy jinaǵyn merziminen buryn paidalaný múmkindigi saqtalady.
«Zeinetaqy jinaǵyn merziminen buryn paidalaný múmkindigi joiylmaidy. Degenmen, júieniń negizgi maqsaty – azamattardy zeinet jasynda turaqty tabyspen qamtamasyz etý», – dedi ministr.
Jańa ádisteme boiynsha jetkiliktilik shegin esepteý kezinde azamattyń qazirgi jasy, zeinetke deiingi kezeńi, kútiletin ómir súrý uzaqtyǵy, bolashaq jarnalar kólemi, investitsiialyq tabys jáne zeinetaqy tólemderiniń jyl saiynǵy ósý qarqyny eskeriledi.
Úkimet jariialaǵan esepteý tártibine sáikes, zeinetaqy jinaǵynyń boljamdy investitsiialyq tabystylyǵy jylyna 9 paiyz, al bolashaq tólemderdiń ósimi 8 paiyz deńgeiinde qarastyrylady.
Sonymen qatar, azamattar zeinetaqy jinaǵyndaǵy artyq qarajatty burynǵydai turǵyn úi satyp alýǵa, ipotekanyń bastapqy jarnasyn tóleýge nemese qaryzdy óteýge, keiin satyp alý quqyǵymen jalǵa alýǵa, turǵyn úi jinaqtaryna aýdarýǵa, emdelýge jáne investitsiialyq basqarýǵa berýge paidalana alady.
