Ekonomist Rýslan Sultanov teńge baǵamyna qatysty qoǵamda jii talqylanatyn máselelerge toqtalyp, ekonomika úshin eń mańyzdysy valiýta kúshti ne álsiz bolýy emes, onyń turaqtylyǵy ekenin aitty, dep habarlaidy dalanews.kz "Qarjylyq saýat" arnasyna siltep.
Mamannyń sózinshe, ulttyq valiýtanyń nyǵaiýy tutynýshylarǵa tiimdi. Mundai jaǵdaida importtyq taýarlar, tehnika men dári-dármek arzandaidy, al shetelge shyǵý shyǵyny azaiady. Sonymen qatar, infliatsiia qarqyny baiaýlaýy múmkin.
Alaida bul jaǵdai eksporttaýshylar úshin qolaily emes. Sebebi olar shetelde ónimin dollarmen satyp, ishki shyǵyndaryn teńgemen óteidi. Teńge kúsheigen saiyn syrttan túsken valiýtalyq tabystyń quny tómendeidi.
Sonymen qatar, sarapshy álsiz teńgeni de tiimdi sheshim dep ataýǵa bolmaitynyn aitty. Onyń pikirinshe, ulttyq valiýtanyń qunsyzdanýy import qymbattaýyna, shyǵyndar artýyna jáne infliatsiia kúsheiýine áser etedi. Bul qarapaiym halyqtyń turmysyna salmaq túsiredi.
Rýslan Sultanovtyń aitýynsha, biznes pen turǵyndarǵa eń qajet nárse - baǵamnyń qai baǵytta ózgeretinin boljaýǵa bolatyn turaqty valiýta.
Ekonomist bazalyq mólsherleme máselesine de toqtaldy. Onyń sózinshe, infliatsiia tolyq báseńdemei turyp mólsherlemeni kúrt tómendetý baǵa qaita ósýine jáne teńgege qysym kúsheiýine sebep bolýy múmkin.
Sondai-aq, ol ár eldiń ekonomikalyq jaǵdaiy ártúrli ekenin eske saldy. Sondyqtan basqa memleketterdegi bazalyq mólsherleme deńgeiin Qazaqstanmen tikelei salystyrý durys emes.
Sarapshy munai baǵasy men teńge baǵamynyń bailanysyna da nazar aýdardy. Onyń pikirinshe, munai quny ósýi ulttyq valiýtaǵa qoldaý kórsetkenimen, baǵamnyń ózgerýine jalǵyz osy faktor áser etpeidi. Munda eksport pen import kólemi, syrtqy qaryzdar, investitsiialar jáne naryqtaǵy suranys siiaqty kóptegen kórsetkish mańyzdy ról atqarady.
Ekonomistiń qorytyndysyna súiensek, el ekonomikasy úshin basty basymdyq - teńgeniń kúshi emes, turaqty baǵam, tómen infliatsiia jáne ekonomikalyq saiasatqa degen senim.
