Ýkraina prezidenti Vladimir Zelenskii Resei basshysy Vladimir Pýtinge arnap ashyq hat jariialap, soǵysty toqtatyp, tikelei kelissóz bastaýǵa úndedi. Ol AQSh pen Eýropa memleketteri ókilderiniń qatysýymen beitarap aýmaqta jeke kezdesý ótkizýdi usynǵan, dep habarlaidy dalanews.kz.
«Soǵystan shyǵýdan qoryqpańyz – dál qazir sizden talap etiletin eń mańyzdy qadam osy», – dep jazdy Zelenskii.
Ýkraina prezidenti hatynda soǵys úshin negizgi jaýapkershilik Pýtinge júkteletinin aityp, qarýly qaqtyǵys sanaly túrde qabyldanǵan sheshim bolǵanyn jetkizdi.
«NATO, geosaiasat nemese orys tili týraly aitýǵa bolady. Biraq bul – naqty sebebi joq, sizdiń jeke tańdaýyńyzdan týǵan soǵys», – delingen hat mátininde.
Sonymen qatar, Ýkraina prezidenti Vladimir Zelenskii Resei basshysy Vladimir Pýtinge beitarap aýmaqta jeke kezdesý ótkizip, soǵysty toqtatý joldaryn talqylaýdy usyndy. Onyń aitýynsha, bolashaqta jasalýy múmkin kelisimderdiń kepili retinde kelissózderge AQSh pen Eýropa elderi de qatysýy qajet.
«Men sizge kezdesý ótkizýdi usynamyn. Soǵys pen beibitshilik máselelerin sheshý úshin memleket basshylaryn dástúrli túrde qabyldaityn elder bar. Shveitsariia, Túrkiia, arab memleketteri — mundai formattaǵy kezdesýdi ótkizýge daiyn ári nietti elder jetkilikti. Negizgi sheshimderdi kóshbasshylar qabyldaidy, bul buryn da solai bolǵan jáne bolashaqta da solai bolady», – dedi Zelenskii.
Ýkraina tarapy kelissózder kezeńinde atysty tolyq toqtatýǵa daiyn ekenin málimdedi. Sondai-aq Kiev áskeri tutqyndardy «bárin bárine aiyrbastaý» qaǵidaty boiynsha almastyrýdy, soǵys kezinde áketilgen beibit turǵyndar men balalardy qaitarý máselesin talqylaýǵa ázir ekenin jetkizdi.
«Qazirgi maidan shebi – diplomatiia bastalýy tiis shep. Ýkraina kelissózder júrip jatqan kezde atysty tolyq toqtatýǵa daiyn. Shynaiy tynyshtyqqa qol jetkizý áreketi – dialog bastaýdyń eń durys joly», – delingen úndeýde.
Hat sońynda Zelenskii aldaǵy sheshim Resei basshylyǵynyń qolynda ekenin atap ótti. Sonymen birge Ýkraina óz táýelsizdigi men egemendigi úshin kúresti jalǵastyra beretinin málimdedi.
