Ótken jyly Almaty oblysynda 15 sport kesheni salynǵan
Almaty oblysynda ótken jyly 818 oryndyq 4 jataqhana salyndy. Sol siiaqty óńirde 15 dene shynyqtyrý-saýyqtyrý kesheni turǵyzylǵan. Bul týraly búgin Ortalyq kommýnikatsiialar qyzmetinde ótken brifing kezinde qoiylǵan suraqqa jaýap bergen Almaty oblysynyń ákimi Amandyq Batalov aitty, – dep habarlaidy Dalanews.kz Almaty oblysy ákiminiń baspasóz qyzmetine silteme jasap.
Oblys basshysy óz sózinde «Taldyqorǵanda joǵary oqý orny – Jetisý ýniversiteti ornalasqan. Birneshe jyldan beri aiaqsyz turǵan qurylys nysanynyń ornyna osy ýniversitet stýdentterine arnap ótken jyly 288 oryndyq zamanaýi, barlyq talapqa sai Stýdentter úiin salyp berdik. Budan bólek bizde úsh kolledjge de jataqhana turǵyzyldy» dedi A. Batalov. Atap aitqanda, Taldyqorǵan medkolledjine – 280, politehnikalyq kolledjine – 200, Bastóbe servistik kolledjine 50 oryndyq jataqhana salynyp, paidalanýǵa berilgen.
– Elbasynyń 100 dene shynyqtyrý-saýyqtyrý keshenin salý týraly tapsyrmasyna sáikes jumys júieli júrip jatyr. Búgingi tańda oblysta 15 dene shynyqtyrý-saýyqtyrý kesheni salyndy. Olardyń qatarynda Narynqol, Baqanas aýyldaryndaǵy da sport keshenderi bar. Osy nysandarda balalar boks, gimnastika, kúres siiaqty kóptegen sport túrlerimen erkin ainalysa alady. Keshen aýlasynda fýtbol alańdary da qarastyrylǵan, – dedi A.Batalov.
