Depýtat Asan Aralbaıdyń tóraǵalyq etýimen ótken sesıanyń kún tártibine Otyrar aýdandyq máslıhatynyń 2017 jylǵy 22 jeltoqsandaǵy №22/106-Vİ «2018-2020 jyldarǵa arnalǵan aýdandyq búdjet týraly» sheshimine ózgerister engizý týraly másele qoıyldy.
Sesıada aýdandyq ekonomıka jáne qarjy bóliminiń basshysy E.Beısenova habarlama jasap, engizilgen ózgerister men tolyqtyrýlardy saralap shyqty. Atalǵan másele boıynsha turaqty komısıanyń otyrysynda baıandalyp, jan-jaqty talqylanǵandyqtan depýtattar biraýyzdan qoldap, sheshim qabyldady.
«Qystyń qamyn, jaz oıla» degen dana halqymyz. Aýdanymyzdaǵy memlekettik mekemeler kómirin erte qamdap, jeke turǵyn úı ıeleri de qystyń qamyn jasap úlgerdi. Ortalyqtaǵy 24 kópqabatty úıler de jylýmen qamtylǵan. Atalǵan úıler jer asty termaldi ystyq sýlarǵa qosylǵan. Ótken jyly qystyń qahary termaldi ystyq sýdyń biraz turǵyn úılerdi jylytýǵa qaýhary jetpeıtinin kórsetken edi. Bıyl osy sharalardyń aldyn alý úshin turǵyn úılerden ózge nysandardy ystyq sýdan ajyratý týraly sheshim qabyldanǵan bolatyn. Iaǵnı termaldy sýdyń barlyq júktemesin tek osy kópqabatty turǵyn úılerdi jylytýǵa jumsaý. Sesıa barysynda osy jóninde baıandaǵan aýdan ákiminiń orynbasary Ábdiǵalı Júnisov ystyq sýdy paıdalanyp otyrǵan ózge komersıalyq nysandardyń ıelerine aldyn ala habarlanyp, eskertilgenin tilge tıek etti.
Sondaı-aq, turǵyn úılerge baratyn ystyq sý temperatýrasyn anyqtap, ony odan ári arttyrý jumystaryna qarjy qaraýdy surady. Óz kezeginde depýtattar atalǵan máseleniń mańyzdylyǵyn eskere otyryp, biraýyzdan sheshim qabyldady.
Sesıada sóz alǵan aýdan ákimi Erlan Aıtahanov alda birqatar jaýapty mindetterdiń turǵanyn aıtyp, eldimekenderdi gazdandyrý, jylý, aýyz sýmen qamtamasyz etý máselelerinde depýtattyq korpýsty birlese jumys jasaýǵa shaqyrdy. Sondaı-aq, aýdan basshysy aýdandyq ortalyq aýrýhananyń jańa basshysy Raıymbek Tasyrbaevty tanystyryp, jumysyna sáttilik tiledi.
Dalanews.kz
