Arabtyń Abu Dhabi Commercial Bank-i (ADCB) Qazaqstanda ámbebap bank litsenziiasyn alǵannan keiin jańasyn óziniń osyndaǵy "enshilesi" - ADCB Islamic Bank-pen biriktirmek niette, dep habarlaidy Dalanews.kz.
Bul týraly Qarjy naryǵyn retteý jáne damytý agenttiginiń (QNRDA) basshysy Mádina Ábilqasymova Kapital.kz-ǵa bergen suqbatynda aitty.
"Arabtyń Abu Dhabi Commercial Bank-i (ADCB) Qazaqstanda ámbebap bank litsenziiasyn alýǵa ótken jyly qyzyǵýshylyq bildirgen. Qazir onyń Qazaqstanda ADCB Islamic Bank atty enshilesi bar. Ámbebap bank litsenziiasyn alý úshin tiisti daiyndyqtar júrgizilýde, qujattardy jinaý jáne t. b. degendei", - deidi Mádina Ábilqasymova.
Agenttik tóraǵasy sheteldik banktiń nege ámbebap bank litsenziiasyna tańdaýy túsip otyrǵanyn da túsindire ketti.
"Bank óziniń biznes-strategiiasyn ózgertti, Qazaqstan Ortalyq Aziiadaǵy banktiń qarjylyq qyzmetterin keńeitý úshin ósim núktesi retinde aiqyndalyp otyr", - dep atap ótti ol.
Mádina Ábilqasymova litsenziiany alǵannan keiin ADCB jańa ámbebap bank pen Qazaqstandaǵy islam bankti biriktirýdi qarastyratyn da naqtylaidy.
"Bul kelesi jyly jasalýy múmkin, sol kezde" Bankter týraly" jańa zań qabyldanady", - degen ol eki bank biriktirilgennen keiin ADCB "islam terezesin" asha alatynyna nazar aýdardy.
"Mundai jumys formatynyń birneshe artyqshylyǵy bar. Birinshiden, kapital mólsheri. Bizde islam banki men litsenziiasy bar ámbebap bankter kapitalyna qoiylatyn talaptar birdei. Sondyqtan aktsionerlerge "islam terezesi" bar bir bank ashyp, ony kapitaldandyrý tiimdirek bolady, iaǵni kapitaldy eki bankke "quiyp" jatqannan góri. Ekinshiden, eki banktiń ornyna "islam terezesi" bar bireýin ustaǵan ońai bolady. Bul arada personaldardy tartý, aqparattyq júieler jáne operatsiialyq shyǵyndar jaiyn aityp otyrmyn", - dep atap ótti Mádina Ábilqasymova.
Sondai-aq ol Shyǵys Eýropa bankteriniń biri Qazaqstanda EDB satyp alýdy josparlap otyrǵanyn rastady.
"Biz satyp alýshy banktiń atyn atai almaimyz, óitkeni ol aqparatty jariia etýge ruqsat etilmegen. Bul aqparat 2025 jyldyń sońynda nemese 2026 jyldyń basynda jariia bolyp qalady dep úmittenemin ", - dedi agenttik basshysy.
"Shyǵys Eýropa bankteriniń biri Qazaqstanda satyp alǵysy kelip otyrǵan bank shaǵyn ba, álde iri me" degen saýalǵa ol bylai jaýap qatty:
"Iri bank. Biz bul mámileni asyǵa kútýdemiz, óitkeni ol Memleket basshysynyń Qazaqstannyń bank naryǵyna úsh sheteldik oiynshyny tartý jónindegi tapsyrmasyn iske asyrýǵa baǵyttalǵan. Bizdiń elde eki sheteldik bank paida boldy, biraq olar tym shaǵyn: Bereke Bank (lesha Bank LLC (Public) enshiles banki) jáne BNK Commercial Bank. Biraq olardyń ósý perspektivalary bar".
Aita ketsek, 2024 jyly Al Hilal, keiinirek ADCB Islamic Bank dep ózgertilgen islam bankiniń jalǵyz aktsioneri Abu Dhabi Commercial Bank (ADCB) bolyp tabylady. Buǵan deiin onyń Qazaqstandaǵy enshilesi Al Hilal arqyly ADCB tobyna tiesili bolǵan. Keiinirek bank korporativti kompaniialarǵa ónimder men qyzmetterdi ADCB brendimen shariǵat qaǵidattary boiynsha usyný nieti baryn habarlady. Qarjylyq top Qazaqstanda Ortalyq Aziia habyn qurýǵa nietti ekendigi de aitylǵan. ADCB Group majoritarlyq aktsioneri - Mubadala PJSC Investment Company (ol 60,2% aktsiialarǵa ie), al ol – Ábý-Dabi Úkimetiniń táýelsiz ál-aýqat qorlarynyń biri. Sondyqtan, onyń túpkilikti baqylaýshy tarapy Ábý-Dabi Úkimeti bolyp tabylady.
