Óskemende Qazaqstan Respýblikasy máslihattarynyń 30 jyldyq mereitoiy qurmetine jáne aldaǵy qyrkúiekte Astanada jalaýyn jelbiretetin V Dúniejúzilik kóshpendiler oiyndaryn qoldaý maqsatynda erekshe sporttyq is-shara ótýde, dep habarlaidy Dalanews.kz Altainews.kz saityna silteme jasap.
Tól oiynymyz toǵyzqumalaqtan uiymdastyrylǵan «Abai júldesi» degen ataýǵa ie oblystyq jarysqa Shyǵys Qazaqstannyń aýdan-qalalarynan 30-ǵa jýyq sportshy qatysty. Arasynda jergilikti jerdegi máslihattardyń depýtattary, qoǵamdyq uiymdar men buqaralyq aqparat quraldarynyń ókilderi de boldy. Solardyń biri – ulandyq Erkejan Abraimova.
– Mundai jarystardy bizderge berilip otyrǵan tamasha múmkindik dep bilemin. Buryndary aýdanda, ózim siiaqty pedagogtar arasynda ótetin jarystarǵa qatyssaq, búgin ózge óńirler men Óskemen qalasynyń toǵyzqumalaqshylarymen sheberlik baiqasýdyń reti kelip tur. Bul saiysta eń epti de eń alǵyr oiynshynyń jeńiske jetýine jáne aldaǵy respýblikalyq jarystarda oblysymyzdyń namysyn abyroimen qorǵaýyna tilektespin, – deidi Ulan aýdany Mamai batyr aýylyndaǵy Lomonosov atyndaǵy orta mekteptiń aǵylshyn tili pániniń muǵalimi Erkejan Abraimova.
Eń aldymen ulttyq oiynymyz – toǵyzqumalaqty dáripteý maqsatynda uiymdastyrylǵan týrnirdiń ashylý saltanatyna oblystyq máslihattyń tóraǵasy Denis Rypakov pen jergilikti toǵyzqumalaq sporty federatsiiasynyń prezidenti Esenberdi Tóleýbai syndy mártebeli meimandar qatysyp, sportshylardyń jarystyń bastalýymen quttyqtady.
Jarystyń basy-qasynda júrgenderdiń aitýynsha, týrnirdiń «Abaidyń» atymen atalýy da tegin emes. Sebebi, toǵyzqumalaqty hakimniń ózi súiip oinaǵan-dy.
– Negizi bul oiynnyń tórt myń jyldyq tarihy bar. Ony «Qoishylardyń algebrasy» dep te ataidy. Árine, óskeleń urpaqtyń oi-órisin damytýǵa kómektesetin toǵyzqumalaq siiaqty oiyndarymyzdy dáriptei berýimiz qajet. Sondyqtan, qazir elimizdiń túkpir-túkpirinde dál osyndai jarystar uiymdastyrylyp jatyr. Munda jeńiske jetken toǵyzqumalaqshylar Astanada ótetin respýblikalyq jarysqa joldama alady, – deidi E.Tóleýbai.
Birneshe kezeńnen turatyn jarys rapid júiesi boiynsha ótip jatqanyn aitý kerek. Jarysqa qatysýǵa niet bildirgen aýdandar men qalalardyń komandalary bilimdiler men zeiindiler báigesine tórt oiynshydan qosqan. Týrnir sharty boiynsha onyń ekeýi er, ekeýi áiel adam bolýǵa tiis.
Týrnir qorytyndysy boiynsha jeńimpazdar men júldegerler medaldarmen, alǵys hattarmen jáne baǵaly syilyqtarmen marapattalady.
