Óskemen qalasynda 1 qyrkúiekten bastap 18 jasqa deiingi balalar qoǵamdyq kólikpen tegin qatynaidy,- dep habarlaidy Dalanews.kz
Mundai sheshim qalalyq máslihat sessiiasynda qabyldandy. Qala ákimi Almat Aqyshov bul qadam áleýmettik qoldaý sharalaryn damytýǵa baǵyttalǵan keshendi baǵdarlamanyń bir bóligi ekenin atap ótti.
— Balalardyń qoǵamdyq kólikte tegin júrýi — bul bolashaqqa salynǵan investitsiia. Qalamyzdyń jas turǵyndaryn qoldaýymyz kerek, — dedi ol.
Sondai-aq depýtattar basqa da sanattaǵy azamattarǵa jeńildik berýdi qoldady. Atap aitqanda, 70 jastan asqandar qoǵamdyq kólikte 55% jeńildikpen júre alady. Ekinshi dúniejúzilik soǵys ardagerleri, basqa elderdegi áskeri qimyldarǵa qatysqan ardagerler men Óskemen qalasynyń qurmetti azamattary tegin qatynaidy.
Budan bólek, tramvaida birinshi toptaǵy múgedekter, ekinshi toptaǵy kórý qabileti nashar jandar, «Altyn alqa», «Kúmis alqa» belgilerimen marapattalǵan kópbalaly analar, «Batyr ana» ataǵynyń iegerleri men «Ana dańqy» ordeniniń I jáne II dárejelerimen marapattalǵan analar tegin júre alady. Osyndai múmkindik 80 jastan asqan turǵyndarǵa da berildi.
— Bul jeńildikter egde jastaǵy azamattar men kópbalaly analar úshin naqty kómek. Biraq biz úshin eń mańyzdy sheshim — oqýshylardyń qoǵamdyq kólikte tegin júrýi bolyp otyr. Endi balalar mektepke, úiirmeler men sektsiialarǵa óz betterimen jáne qaýipsiz túrde bara alady. Otbasylyq biýdjetke de qosymsha salmaq salynbaidy. Sondyqtan bul bastamany biraýyzdan qoldadyq, — dedi qalalyq máslihat depýtaty Andrei Liverinov.
Aita keteiik, jeńildikter úshin qalalyq biýdjetten qarajat bólinedi.
