Áýelden ákeniń qoǵamdaǵy róli zor bolatyn. Búgingi tańda quldyryp ketken osy bir rýhani qundylyqqa kóńil bólinip, erekshe nazarǵa alyna bastady. Osyǵan orai Shyǵys Qazaqstan oblysynyń ortalyǵynda «Ákeler forýmy» ótti.
Forýmnyń negizgi maqsaty – ákeniń otbasyndaǵy rólin arttyrý jáne ákeler institýtyn qoǵamda tanymal etý.
Forýmǵa bilim, quqyq qorǵaý salalarynyń ókilderi qatysyp, urpaq tárbiesinde ózgelerge ónege bolǵan ákeler marapattaldy.
– Biz Shyǵysta ótip jatqan Ákeler forýmyn qoldaý maqsatynda Astanadan arnaiy keldik. Munda bala tárbiesindegi áke róliniń mańyzy týraly sóz boldy.
Bala tárbiesi tek ananyń mindeti emes, ákege de úlken jaýapkershilik júkteidi. Tarihqa boilasaq, bul rette ákeniń róli zor. Ýaqyt óte kele naryqtyq ekonomikanyń áseri me eken nemese basqa da faktorlarǵa bailanysty ma áiteýir ákelerdiń bala tárbiesinen qalys qalǵany baiqaldy.
Búgingi forýmǵa qatysqan árbir er adam balasynyń ómirindegi óz ornyn tereń túsinip, oi qorytady dep senemin, – deidi «Bilim-innovatsiia» halyqaralyq qoǵamdyq qorynyń qoǵamdyq bailanystar jónindegi vitse-prezidenti Arafat Ábdihalyquly.
Forýmǵa qatysýshylar tárbie jáne otbasy qundylyqtary jóninde baiandama jasap, óz oilaryn ortaǵa saldy. Kesh qatysýshylaryn Shyǵys Qazaqstan oblystyq máslihatynyń tóraǵasy Denis Rypakov quttyqtap, rýhani sharaǵa sáttilik tiledi.
– Ár otbasynda ákeniń orny erekshe, áke – ár bala úshin asqar taý. Ananyń meiirimin, ákeniń qamqorlyǵyn kórip ósken bala ardy oilaityn adal azamat bolyp erjetedi. Búgingi forýmǵa óz otbasynda jáne qoǵamda bala tárbiesine erekshe kóńil bólip júrgen aǵa býyn ókilderi qatysyp otyr. Osy forým qoǵamdaǵy ákeler róliniń mańyzyn jáne ákeler institýtynyń bedelin arttyrýǵa tyń serpin beredi dep senemin, – dedi Denis Rypakov.
Forým barysynda óz otbasyndaǵy tárbieni ózgege úlgi etip, balalary ártúrli salada jetistikke jetip júrgen óńirimzdiń ónegeli ákeleri marapattaldy.
– Shemonaiha aýdanyndaǵy Ýba shipajaiynda áleýmettik salada jumys isteimin. Qosymsha bapker retinde birqansha shákirtti sportqa tárbieleimin. Úsh qyzdyń ákesimin. Ekinshi qyzym sport sheberine úmitker, respýblikalyq týrnirlerdiń bes dúrkin jeńimpazy. Ózge balalarym men shákirtterimniń jetistikterin sanamalap aita bersem óte kóp. Jalpy, áke balaǵa meiirimdi, shynshyl, qatal da bola bilýi kerek. Áke qyz balany mahabbatpen, ul balany qas-qabaqpen tárbieleýi kerek. Bul bizdiń baba ǵuryptan tárbiemizde bar úrdis, – deidi shemonaihalyq úlgili áke Jasulan Saiasatqanuly.
Aita keteiik, 2023 jyldan beri elimizde maýsymnyń úshinshi jeksenbisinde Ákeler kúni atap ótilip keledi.
