اۋەلدەن اكەنىڭ قوعامداعى ءرولى زور بولاتىن. بۇگىنگى تاڭدا قۇلدىرىپ كەتكەن وسى ءبىر رۋحاني قۇندىلىققا كوڭىل ءبولىنىپ، ەرەكشە نازارعا الىنا باستادى. وسىعان وراي شىعىس قازاقستان وبلىسىنىڭ ورتالىعىندا «اكەلەر فورۋمى» ءوتتى.

فورۋمنىڭ نەگىزگى ماقساتى – اكەنىڭ وتباسىنداعى ءرولىن ارتتىرۋ جانە اكەلەر ينستيتۋتىن قوعامدا تانىمال ەتۋ.

فورۋمعا ءبىلىم، قۇقىق قورعاۋ سالالارىنىڭ وكىلدەرى قاتىسىپ، ۇرپاق تاربيەسىندە وزگەلەرگە ونەگە بولعان اكەلەر ماراپاتتالدى.

– ءبىز شىعىستا ءوتىپ جاتقان اكەلەر فورۋمىن قولداۋ ماقساتىندا استانادان ارنايى كەلدىك. مۇندا بالا تاربيەسىندەگى اكە ءرولىنىڭ ماڭىزى تۋرالى ءسوز بولدى.

بالا تاربيەسى تەك انانىڭ مىندەتى ەمەس، اكەگە دە ۇلكەن جاۋاپكەرشىلىك جۇكتەيدى. تاريحقا بويلاساق، بۇل رەتتە اكەنىڭ ءرولى زور. ۋاقىت وتە كەلە نارىقتىق ەكونوميكانىڭ اسەرى مە ەكەن نەمەسە باسقا دا فاكتورلارعا بايلانىستى ما ايتەۋىر اكەلەردىڭ بالا تاربيەسىنەن قالىس قالعانى بايقالدى.

بۇگىنگى فورۋمعا قاتىسقان ءاربىر ەر ادام بالاسىنىڭ ومىرىندەگى ءوز ورنىن تەرەڭ ءتۇسىنىپ، وي قورىتادى دەپ سەنەمىن، – دەيدى «ءبىلىم-يننوۆاسيا» حالىقارالىق قوعامدىق قورىنىڭ قوعامدىق بايلانىستار جونىندەگى ۆيسە-پرەزيدەنتى ارافات ءابدىحالىق ۇلى.

فورۋمعا قاتىسۋشىلار تاربيە جانە وتباسى قۇندىلىقتارى جونىندە بايانداما جاساپ، ءوز ويلارىن ورتاعا سالدى. كەش قاتىسۋشىلارىن شىعىس قازاقستان وبلىستىق ءماسليحاتىنىڭ ءتوراعاسى دەنيس رىپاكوۆ قۇتتىقتاپ، رۋحاني شاراعا ساتتىلىك تىلەدى.

– ءار وتباسىندا اكەنىڭ ورنى ەرەكشە، اكە – ءار بالا ءۇشىن اسقار تاۋ. انانىڭ مەيىرىمىن، اكەنىڭ قامقورلىعىن كورىپ وسكەن بالا اردى ويلايتىن ادال ازامات بولىپ ەرجەتەدى. بۇگىنگى فورۋمعا ءوز وتباسىندا جانە قوعامدا بالا تاربيەسىنە ەرەكشە كوڭىل ءبولىپ جۇرگەن اعا بۋىن وكىلدەرى قاتىسىپ وتىر. وسى فورۋم قوعامداعى اكەلەر ءرولىنىڭ ماڭىزىن جانە اكەلەر ينستيتۋتىنىڭ بەدەلىن ارتتىرۋعا تىڭ سەرپىن بەرەدى دەپ سەنەمىن، – دەدى دەنيس رىپاكوۆ.

فورۋم بارىسىندا ءوز وتباسىنداعى تاربيەنى وزگەگە ۇلگى ەتىپ، بالالارى ءارتۇرلى سالادا جەتىستىككە جەتىپ جۇرگەن ءوڭىرىمزدىڭ ونەگەلى اكەلەرى ماراپاتتالدى.

– شەمونايحا اۋدانىنداعى ۋبا شيپاجايىندا الەۋمەتتىك سالادا جۇمىس ىستەيمىن. قوسىمشا باپكەر رەتىندە ءبىرقانشا شاكىرتتى سپورتقا تاربيەلەيمىن. ءۇش قىزدىڭ اكەسىمىن. ەكىنشى قىزىم سپورت شەبەرىنە ۇمىتكەر، رەسپۋبليكالىق تۋرنيرلەردىڭ بەس دۇركىن جەڭىمپازى. وزگە بالالارىم مەن شاكىرتتەرىمنىڭ جەتىستىكتەرىن سانامالاپ ايتا بەرسەم وتە كوپ. جالپى، اكە بالاعا مەيىرىمدى، شىنشىل، قاتال دا بولا ءبىلۋى كەرەك. اكە قىز بالانى ماحابباتپەن، ۇل بالانى قاس-قاباقپەن تاربيەلەۋى كەرەك. بۇل ءبىزدىڭ بابا عۇرىپتان تاربيەمىزدە بار ءۇردىس، – دەيدى شەمونايحالىق ۇلگىلى اكە جاسۇلان ساياساتقان ۇلى.

ايتا كەتەيىك، 2023 جىلدان بەرى ەلىمىزدە ماۋسىمنىڭ ءۇشىنشى جەكسەنبىسىندە اكەلەر كۇنى اتاپ ءوتىلىپ كەلەدى.