"Samuryq-Energo" memlekettik kompaniiasy Óskemen jáne Shúlbi GES-terin óziniń enshiles kompaniialarynyń biri - Qazaq Green Power PLC-ge ótkizip bergen bolyp shyqty. Osylaisha bul eki strategiialyq nysanǵa qatysty baqylaýyn "Samuryq-Energo" joǵaltqan joq, dep habarlaidy Dalanews.kz.
"Mundai sheshim JEK jáne GES aktivterin "jasyl" energetikany damytýǵa mamandanǵan jeke zań qurylymyna shoǵyrlandyrý úshin qabyldandy", delingen Kapital.kz joldaǵan saýalǵa "Samuryq-Energo" kompaniiasynyń bergen jaýabynda.
Bul aktivterdi ótkizip berý Qazaq Green Power PLC jarǵylyq kapitalyn ulǵaitý úshin óziniń aktsiialaryn jalǵyz aktsioneri "Samuryq-Energoǵa" satý arqyly júzege asyrylǵan.
"Qazaq Green Power PLC-tyń ornalastyrylǵan aktsiialary úshin "Óskemen GES" JShS jáne "Shúlbi GES" JShS-nyń 100% úlesi berildi. Joǵaryda atalǵan aktivterdi ótkizip berý nátijesinde "Samuryq-Energo" óziniń 100% enshiles kompaniiasy Qazaq Green Power PLC arqyly osy obektilerdegi úlesterine ie bolyp qala beredi", - dep habarlady memlekettik kompaniia.
Jalpy,"Samuryq-Energo" memlekettik kompaniiasynyń Shúlbi men Óskemen GES-terin óz balansynan shyǵarǵany kúni keshe belgili boldy. Osyndai aqparat KASE saityna paida bolǵanymen, bul aktivterdiń kimge jáne qandai baǵamen satylǵan aitylmady. Bul túrli alyp-qashpa áńgimeni týdyryp, keibir BAQ 2021 jyly Úkimet "Shúlbi GES-i" JShS men "Óskemen GES-i" JShS-lardaǵy 100% memlekettik úlesti Ábý-Dabi jáne Qazaqstan investorlar konsortsiýmyna tikelei ataýly satýdy josparlaǵanyn eske aldy. Sol kezde bul eki nysan arab investorlaryna satylmaq bolǵan. Alaida Úkimet keiinnen bul oiynan ainyp qalǵan. Qazir belgili bolyp otyrǵandai, strategiialyq aktivter bul joly da bótennen qolynda ketpepti.
Aita ketsek, "Samuryq-Energo" 2024 jyldyń kókteminde "Samuryq-Qazyna" memlekettik holdinginen eki GES-ti satyp alǵan bolatyn. "Shúlbi GES-i" JShS 36,2 mlrd teńgege, al "Óskemen GES-i" JShS 23,5 mlrd teńgege satyp alyndy. Saýda-sattyq naryqtyq baǵaǵa sai júrgizildi. Al qos nysandy satyp alý qor birjasyna "Samuryq-Energonyń" ornalastyrǵan aktsiialary esebinen júrgizildi. 2024 jyldyń sáýir aiynda "Samuryq-Energo" KASE-ge 96,4 myń teńgeniń 375,5 myń qarapaiym aktsiiasyn jáne 90,4 myń teńgeniń 260 myń aktsiiasyn shyǵardy. Qosymsha emissiianyń jalpy kólemi 59,7 mlrd teńgeni qurady. "Samuryq-Energo" osy aktsiialarmen 100 paiyz úlesti satyp alýda tólem jasady.
Shúlbi GES-i - Semei qalasynan 70 shaqyrym jerde ornalasqan Ertis kaskadyndaǵy úshinshi stantsiia. Ol jobalyq qýaty (702 MVt) boiynsha Qazaqstandaǵy eń iri nysan bolyp tabylady. GES 1987 jyly iske qosyldy.
Óskemen GES-i - Ertis GES kaskadynyń ekinshi satysy jáne Buqtyrma GES kontrrettegishiniń rólin atqarady. Ol 1952 jyly paidalanýǵa berildi. Onyń belgilengen (jobalyq) qýaty - 367,8 MVt, al naqtysynda 335 MVt-ty quraidy. Qos nysan "Samuryq-Qazyna" UÁQ-ǵa tiesili bolǵanǵa deiin QR Energetika ministrliginiń menshiginde bolǵan.
"Samuryq-Energo" AQ - bul "Samuryq-Qazyna" memlekettik holdinginiń qurylymyna kiretin iri kópsalaly elektr energetikalyq holding. Onyń qyzmeti energiiamen jabdyqtaý júiesin qalyptastyrýǵa baǵyttalǵan.
