Qazaqstanda úidegi internet baǵasy álemdegi eń qoljetimdi internetterdiń biri sanalady. Bul týraly Global Broadband Price League reitinginiń derekteri kórsetedi, dep habarlaidy dalanews.kz.
Zertteý nátijesine sáikes, Qazaqstan tirkelgen (fiksirlengen) internet quny boiynsha 214 eldiń ishinde 19-orynǵa jaiǵasqan. Sarapshylar elimizdegi 11 tariftik usynysty taldap, reitingke engizilgen ortasha baǵany aiyna 7 499 teńge nemese 15,23 AQSh dollary dep eseptegen.
Osylaisha, jahandyq salystyrýda Qazaqstan úi interneti arzan elderdiń qataryna kiredi.
Salystyrý úshin, Japoniiada tirkelgen internettiń ortasha ailyq quny 32,62 dollardy quraidy. Bul Qazaqstandaǵy kórsetkishten eki eseden astam joǵary. Reitingte Japoniia 76-orynda bolsa, Qazaqstan 19-orynǵa ornalasqan.
Reiting qalai jasaldy?
Zertteý avtorlary álemniń 214 elindegi 2 631 internet tarifin saralaǵan. Qazaqstan boiynsha 11 tariftik jospar irikteýge engizilgen.
Reitingte tek tirkelgen internet qyzmetteri esepke alynǵan. Mobildi internet, 4G jáne 5G tarifteri zertteýge kirmegen. Sonymen qatar korporativtik usynystar da qarastyrylmaǵan.
Teledidar, uialy bailanys jáne basqa qyzmettermen birge usynylatyn paketter múmkindiginshe esepten shyǵarylǵan. Eger belgili bir elde internet jeke qyzmet retinde satylmasa, quramynda interneti bar eń arzan paket negizge alynǵan.
Tarifter tek eń arzan usynystar arasynan tańdalmaǵan. Sarapshylar ártúrli jyldamdyqtaǵy qyzmetterdi qamtýǵa tyrysqan. Atap aitqanda, 30 Mbit/s deiingi, 31–100 Mbit/s, 101–300 Mbit/s, 301–999 Mbit/s jáne gigabittik tarifter qarastyrylǵan.
Zertteý barysynda jańa abonentterge arnalǵan ýaqytsha jeńildikter, qosylý aqysy, roýter quny, keshbek jáne basqa da jarnamalyq usynystar esepke alynbaǵan. Tek ai saiynǵy standartty tólem mólsheri negizge alynǵan.
Qazaqstanǵa internet baǵasyn arzandatýdyń qajeti bar ma?
Zertteý ádistemesinde elderdiń reitingi eń arzan tarif boiynsha emes, tarifterdiń medianalyq kórsetkishi arqyly anyqtalǵan. Iaǵni sarapshylar naryqtaǵy ádettegi baǵa deńgeiin kórsetýge tyrysqan.
Sondyqtan Qazaqstanǵa úi internetiniń baǵasy boiynsha álemdi qýyp jetý kerek degen pikirlerge statistika kerisinshe jaýap beredi. Nominaldy dollarlyq kórsetkish boiynsha elimizdegi tirkelgen internet kóptegen damyǵan memleketterge qaraǵanda arzan. Olardyń qatarynda Japoniia, Ulybritaniia, Germaniia, AQSh jáne Ońtústik Koreia bar.
Sarapshylardyń pikirinshe, salanyń negizgi mindeti internetti kez kelgen jolmen arzandatý emes. Basty maqsat – qoljetimdi baǵany saqtai otyryp, abonentterdiń talaptaryna sai kelmeitin óńirlerde qyzmet sapasyn jaqsartý.
