2008-2017 jyldary Qazaqstan ekonomikaǵa jalpy somasy 82 mlrd dollardy quraityn tikelei investitsiia tartqan. Investitsiianyń basym bóligi ken óndirý salasynyń úlesinde.
"Kárimov ketip, bilik ózgergeli Ózbekstan da esigin aiqara ashyp, jańa ekonomikalyq reformalar júrgizýde. Eldegi qolaily biznes-ahýal bolashaqta bul elge investitsiianyń kóptep aǵylaryn ańǵartady" deidi kompaniia mamandary.
Ekonomikalyq áriptestik jáne damý uiymynyń dereginshe sońǵy 20 jylda aimaqtyń ekonomikalyq ósimi joǵary bolǵan.
2000-2010 jyldary aimaqtaǵy jalpy ishki ónim (JIÓ) jylyna 8 paiyzǵa ósip otyrǵan, al eńbek ónimdiligi álemdik ortasha kórsetkishterden joǵary bolypty. Osy jyldar aralyǵynda aimaqqa baǵyttalǵan tikelei investitsiialar 9 esege ósken. 2010 jyldan kúnige deiin aimaqtyń JIÓ-si 25 paiyzǵa ósýde.
Qazirgi tańda aimaqtyń álemdik JIÓ-degi úlesi 0,3 paiyzdy quraidy.
2017 jyly Orta Aziianyń jiyntyq jalpy ishki ónimi 265 mlrd dollardy quraǵan, bul kólemi jaǵynan Ortalyq Amerikamen (255 mlrd), Finliandiiamen (252 mlrd) jáne Chilimen (277 mlrd) para-par.
Orta Aziiada jer shary halqynyń 1 paiyzy turady (71,9 mln adam), bul kólemi jaǵynan Tailand (69 mln adam, JIÓ 455 mlrd) nemese Túrkiia (81 mln adam, JIÓ 851 mlrd) naryǵymen teń.
Aimaq aýmaǵy 4 mln sharshy shaqyrym, bul EýroOdaq territoriiasymen teń.
Alaida aimaqtaǵy adam basyna shaqqandaǵy jalpy ishki ónim (3719 dollar) Tailand (6594) nemese Túrkiia (10541) siiaqty damýshy elderge qaraǵanda kóp tómen.
Aimaqtaǵy 2016 jylǵy jiyntyq eksporttyń kólemi 58 mlrd dollardy qurasa, sonyń 3 mlrd-y (6 paiyzy) ishki aimaqtyq alys-beristiń úlesinde bolǵan. Aimaqtyq saýda Qazaqstan eksportynyń 5 paiyzyn, Ózbekstan eksportynyń 13 paiyzyn quraidy.
2007 jyly Qazaqstan prezidenti Nazarbaev Orta Aziia ekonomikalyq-saiasi odaǵyn qurýdy usyndy. "Erkin taýar almasaiyq, osy arqyly aýyl sharýashylyǵy men óndirisimizdi órkendeteiik" dedi ol. Alaida bul usynys qoldaý tapqan joq.
Investorlar úshin Orta Aziia áli de beitanys, áli de igerilmegen naryq. Olar Orta Aziiaǵa qaraǵanda, Balqan elderi men Ortalyq Amerikaǵa qarjy quiǵandy qaýipsiz kóredi.
Orta Aziiadaǵy tikelei investitsiianyń basym bóligi ken óndirý salasyna baǵyttalǵan, aimaqtaǵy shikizattyq emes sektorǵa salynǵan investitsiia kólemi 2008-2016 jyldaǵy jalpy investitsiianyń 18 paiyzyn qurady.
Bul aralyqta Ortalyq Amerikadaǵy shikizattyq emes sektorǵa salynǵan investitsiia kólemi 35,9 paiyzdy, al Balqan elderinde bul kórsetkish 47,2 paiyzdy quraǵan.
Dalanews.kz Orta Aziianyń investitsiialyq áleýetin pash etetin infografikany nazaryńyzǵa usynady.
Materialdy daiyndaǵan Liailia Boltaeva
