Forbes Kazakhstan jáne orys tili
Aitary joq, Forbes Kazakhstan jýrnaly elimizdegi isker top ókilderine arnalǵan orys tilindegi mańyzdy jýrnal ekeni belgili.
Bul turǵydan alǵanda kez kelgen qazaq Forbes Kazakhstan jýrnalymen maqtanýyna bolady.
Basylym elimizdegi jetekshi bankterdiń reitingin túzetin jetekshi jýrnal ekenin de bilemiz. Sol sebepti elimizdegi qarjy uiymdary jarnamaǵa baǵyttalǵan biýdjetin qazaqtildi basylymdardy attap ótip, Forbes Kazakhstan-ǵa bergisi kelip turady. Bersin!
Biz baibalam salǵanymyzben olar bizdiń qazaqsha oibaiymyzdy báribir de túsinbeidi. Qaitemiz endi?
Forbes Kazakhstan jýrnalyn shyǵarý isine bel býyp, bilek sybana kirisken Asqar Aýkenov óziniń jazǵan maqalasynda basylymnyń bank salasyndaǵy reiting túzetin negizgi quralǵa ainalǵanyn aitypty. Sóz joq, maqtanýǵa turarlyq jait.
Aýkenov myrza Batys elderiniń Reseige salynǵan sanktsiialarynan keiin Qazaqstandaǵy Resei bankteri jumysyn toqtatpai, qazaqstandyq bankterdiń quramyna ótip, olardyń salymshylary úshin jaily jaǵdai jasalynǵanyn aityp, onsyz da elge belgili jaitty taǵy bir qaitalap ótipti.
Álemdegi ózgeris bizdiń «qara orystardy» ainalyp ótti
Orys áskeri Ýkrainaǵa basyp kirip, qyrǵyn soǵys salǵan kúnnen bastap álemde qundylyqtar men oi-paiymdar ózgerdi. Ózgeriske túspegen bizdiń qara orystar.
Onyń ishinde ózderin tehnokrat, liberaldy toptyń ókili sanaityn qazaq kásipkerleri. Óitkeni olardyń biznesiniń kópshiligi Reseimen bailanysty. Sondyqtan olarǵa bul dúnieniń ózgergeni túkke de qajeti joq. Osy soǵystan keiin biliktiń ózgerýinen kásipkerlerdiń ózgerýi qiyn ekenin anyq baiqaǵandai boldyq.
Forbes Kazakhstan jýrnalynyń redaktory maqalasynyń sońynda álemde tektonikalyq ózgeristerdińoryn alyp jatqanyn aitypty.
– Osydan birneshe jyl buryn Forbes Kazakhstan jýrnaly Forbes brendimen shyǵatyn dúniejúzindegi (!) úshinshi basylym edi. Ol kezde aldymyzda Resei men Ýkrainada shyǵatyn Forbes jýrnaly bolatyn. Al Ýkrainadaǵy soǵystan keiin Ýkrainada shyǵatyn Forbes jýrnaly orys tilinde shyǵýyn toqtatty (endi qaita shyǵýy neǵaibyl). Al Reseidegi Forbes Russia basylymyn qaǵazǵa basyp shyǵarý isi toqtady. Óitkeni Reseide jumys isteitin halyqaralyq kompaniialar sanktsiiadan keiin elden ketýge májbúr boldy. Osylaisha, Reseide Forbes Russia basylymyn shyǵarý isi shyǵynǵa ainaldy. Endi orys tilinde shyǵatyn jalǵyz, birden-bir Forbes jýrnaly Qazaqstanda ǵana shyǵatyn boldy, – dep bas redaktor bórkin aspanǵa atyp qýanypty.
Iá, Aýkenovtyń jerden jeti qoian tapqandai qýanatyn jóni bar. Endi Forbes Kazakhstan jýrnalyna jarnama berýshilerdiń qatary arta túsedi. Aldaǵy ýaqytta Ýkraina men Reseidegi kompaniialar da Forbes Kazakhstan-men jumys isteýge yqylasy oianyp, qarjyny aiamai tógetin bolady. Qazaq tili she?.. Ony oilaǵan jan bar ma?
Búginde búkil álem Reseiden, orys tilinen, orys mádenietinen teris ainalyp jatyr. Al biz bolsaq, Forbes jýrnalynyń orys tilindegi nusqasyn óltirmei, shyǵarýǵa kúsh salǵan el retinde aidai álemge tanylatyn boldyq.
Bul ne? Bul – biznes. Bul – paida. Kimge? Budan memleketke de, halyqqa da paida joq. Bul elimizdegi at tóbelindei orystildi qaýymnyń qaltasyn qampitýǵa baǵyttalǵan shara.
Bul – qazaq tiline jasalǵan taǵy bir soqqy dep qabyldaýǵa bolatyn shyǵar. Sizder qalai oilaisyzdar!
Forbes jýrnalyn búkil álem tanidy. Orys tilindegi Forbes Qazaqstanda ǵana shyǵatyn bolsa, álem elderi Qazaqstandy orys tiliniń ekinshi otany dep qabyldaityny anyq qoi.
Nurlan JUMAHAN
