Qazaqstan musylmandary dini basqarmasy mektepte oramal taǵýǵa múmkindik bergen jekemenshik bilim berý uiymdaryn litsenziiadan aiyrý siiaqty qatań sharalardy qoldanýdy quptamaidy, dep habarlaidy dalanews.kz.
QMDB sońǵy kúnderi qoǵamda mektep oqýshylarynyń oramal taǵýyna qatysty másele qaita kóterilgenin atap ótti. Buǵan buqaralyq aqparat quraldarynda mektep formasyna qoiylatyn talaptardy saqtamaǵan, onyń ishinde oqýshy qyzdarǵa oramal taǵýǵa ruqsat bergen jekemenshik bilim berý uiymdary litsenziiasynan aiyrylýy múmkin ekeni týraly aqparattyń taralýy sebep bolǵan.
Osyǵan bailanysty Qazaqstan musylmandary dini basqarmasy óz ustanymyn bildirdi.
Islam shariǵaty boiynsha baliǵat jasyna jetken musylman qyzdyń oramal taǵýy – paryz. QMDB bul máselege qatysty dini ustanymynyń ózgermegenin jáne osyǵan deiin de óz pozitsiiasyn birneshe ret ashyq bildirgenin aitty.
Basqarma mektep jasyndaǵy qyzdardyń bilim alýyna kedergi keltirmei, dini mindetin oryndaýyna múmkindik beretin ońtaily sheshim qabyldaý jóninde tiisti memlekettik organdarǵa usynystar joldaǵan.
QMDB-nyń pikirinshe, mektep formasynyń jalpy úlgisi men túsine sáikes keletin oramal taǵýǵa múmkindik berý máselesin qarastyrýǵa bolady.
Sonymen qatar dini basqarma baliǵat jasyna jetken musylman qyzdardyń mektep formasyna úilespeitin oramal taǵýyna múmkindik berýdi qoldamaidy.
«Bizdiń paiymymyzsha, oqýshynyń oramal taǵýy onyń bilim alýyna kedergi bolmaýy tiis. Sol sekildi bilim berý uiymdarynyń musylman qyzdardyń dini ustanymyna túsinistik tanytýy mektepti litsenziiadan aiyrýǵa negiz bolatyn máselege ainalmaǵany jón. Osy sebepti QMDB oramal taǵýǵa múmkindik bergen jekemenshik mektepterdi litsenziiadan aiyrý sekildi qatań sharalardy qoldanýdy quptamaidy», – delingen basqarma habarlamasynda.
QMDB zaiyrlylyq uǵymy dindi joqqa shyǵarý nemese azamattyń dini senimin shekteý degen sóz emes ekenin atap ótti. Zaiyrly memlekette din memleketten bólingenimen, azamattardyń ar-ojdan bostandyǵyna qurmetpen qaraý qaǵidaty saqtalady.
Basqarma Qazaqstan zańnamasynda da zańdy dini qyzmetke kedergi keltirýge jáne adamnyń dinge kózqarasyna bailanysty azamattyq quqyqtarynyń buzylýyna jol berilmeitini kórsetilgenin eske saldy.
QMDB oramal máselesi qoǵamda birneshe jyldan beri talqylanyp kele jatqanyn atap ótti. Ony tek tyiym salý jáne ákimshilik sharalar arqyly sheshý qoǵamdaǵy túsinispeýshilikti odan ári tereńdetýi múmkin.
Sondyqtan dini basqarma Oqý-aǵartý ministrligine jáne basqa da ýákiletti memlekettik organdarǵa mektep formasynyń talaptaryn saqtai otyryp, baliǵat jasyna jetken musylman qyzdarǵa oramal taǵýǵa múmkindik beretin naqty quqyqtyq tetik qarastyrýdy usyndy.
«Biz úshin balalarymyzdyń ári bilimdi, ári tárbieli, ári óz senimine qurmetpen qaraityn azamat bolyp qalyptasýy mańyzdy», – dep atap ótti QMDB.
Basqarma atalǵan máseleni memlekettik organdar, din ókilderi, ata-analar jáne sarapshylardyń qatysýymen syndarly dialog arqyly sheshýge daiyn ekenin málimdedi.
