Qazaqstanda tsifrlyq aktivterin litsenziialanbaǵan platformalarda ustaityn azamattarǵa salyqtyq raqymshylyq jasaý usynyldy, dep habarlaidy dalanews.kz.
Usynysqa sáikes, salyq tóleýshi 2028 jylǵy 31 jeltoqsanǵa deiin tsifrlyq aktivterin litsenziialanbaǵan platformalardan tsifrlyq aktivter qyzmetterin kórsetýshilerdiń litsenziialanǵan platformalaryna tolyq aýdarǵan jaǵdaida, tsifrlyq aktivtermen jasalǵan operatsiialarǵa bailanysty jeke tulǵanyń jeke shotynda esepte turǵan bereshek salyqtyq bereshek bolyp tanylmaidy.
Sondai-aq osy bereshekke eseptelgen ósimpul men salyq salý salasyndaǵy quqyq buzýshylyqtar úshin salynǵan aiyppuldy esepten shyǵarý usynylyp otyr. Bul normalar 2026 jylǵy 1 qańtardan 2028 jylǵy 31 jeltoqsanǵa deiingi kezeńdegi tsifrlyq aktivter operatsiialarynan túsken kiristerge qatysty bolady.
Zań jobasyn ázirleýshilerdiń aitýynsha, Qazaqstanda el aýmaǵynda litsenziialanbaǵan jahandyq kriptoplatformalarda alynǵan tsifrlyq aktivterge salyq salýdyń ashyq mehanizmi joq.
Olardyń pikirinshe, mundai platformalardy paidalanýshylar salyqtyq júktemeden jáne qarajattyń shyǵý tegin rastaý qajettiliginen qaýiptenip, aktivterin litsenziialanǵan birjalarǵa aýdarýǵa asyqpaidy. Bul tsifrlyq aktivter ainalymynyń shamamen 47%-ynyń «kóleńkeli» sektorda qalýyna ákelip otyr.
«Usynylyp otyrǵan sharalar tsifrlyq aktivterdiń edáýir bóligin kóleńkeden shyǵaryp, zańdy ainalymǵa engizýge, litsenziialanǵan platformalarǵa ótimdilik tartýǵa jáne kapitaldyń syrtqa ketýine jol bermeýge múmkindik beredi. Sonymen qatar uzaq merzimdi investitsiialar úshin boljamdy salyqtyq orta qalyptasady», – dep túsindirdi ázirleýshiler.
