Qazaqstannyń Syrtqy ister ministrligi Los-Andjeleske barǵan qazaqstandyq stýdentterdiń saparyn uiymdastyrýshylarmen bailanys ornatty, dep habarlaidy dalanews.kz.
Ministrliktiń málimetinshe, qazaqstandyqtardyń basym bóligi elge ushyp ketken nemese qaitar jolda. Keibir stýdentter keri reisine deiin Los-Andjeleste qalýy múmkin.
«Qolda bar málimet boiynsha, azamattarymyzdyń basym bóligi Qazaqstanǵa ushyp ketti nemese jolda kele jatyr. Saparǵa qatysýshylardyń keibiri keri reisine deiin Los-Andjeleste qalýy múmkin. Áýe biletterin azamattardyń ózderi satyp alǵan jáne qaitý baǵyttary ártúrli bolǵandyqtan, qazirgi ýaqytta barlyq qatysýshynyń AQSh-tan ketkenin rastaý múmkin emes», – delingen ministrlik habarlamasynda.
Qazaqstannyń San-Frantsiskodaǵy Bas konsýldyǵy jaǵdaidy baqylaýda ustap otyr. Qajet bolǵan jaǵdaida azamattarǵa konsýldyq kómek kórsetýge daiyn.
SIM qazirgi ýaqytta qazaqstandyq azamattardan diplomatiialyq ókildikterge eshqandai ótinish túspegenin habarlady.
Buǵan deiin J-1 vizasy bar qazaqstandyq stýdentterdiń AQSh boiynsha sapary besinshi kúni toqtatylǵany belgili bolǵan. Sonyń saldarynan 200 stýdent qonaq úi men transfersiz qalǵan.
