Jambyl oblysynda meditsina qyzmetkeriniń ólimine qatysty adam urlaý jáne ólimge ákep soqqan densaýlyqqa qasaqana aýyr ziian keltirý faktileri boiynsha sotqa deiingi tergeý bastaldy, dep habarlaidy dalanews.kz.
Týysynyń aitýynsha, marqum aýrýhanada jumys istegen. Oǵan buryn patsientteriniń biriniń burynǵy kúieýi birneshe ret telefon shalyp, balaǵattap, kezdesýge shaqyrǵan.
Kezdesýge barǵan kezde oǵan birneshe adam shabýyl jasap, uryp-soǵyp, kóliktiń júksalǵyshyna salyp áketken. Keiin er adamdy Asa ózeniniń mańyna aparyp, taǵy da soqqyǵa jyqqan.
Odan keiin er adamdy óziniń kóligine otyrǵyzyp, aýrýhanaǵa jetkizgen. Ony kósheden taýyp alǵandaryn aitqan. Alaida meditsina qyzmetkeri alǵan jaraqatynan esin jimastan kóz jumǵan.
Politsiia atalǵan derek boiynsha sotqa deiingi tergeý júrgizilip jatqanyn habarlady. Oqiǵanyń naqty mán-jaiy men oǵan qatysy bar adamdardyń áreketine tergeý nátijesinde quqyqtyq baǵa berilmek.
