Oral qalasyndaǵy jylý elektr ortalyǵynda japondyq Hitachi kompaniiasynyń gaz týrbinalyq qondyrǵysy kúrdeli jóndeýden keiin tolyq qýatynda jumysyn bastady, dep habarlaidy Dala News.
Qýaty 28 MVt bolatyn gaz týrbinaly qondyrǵy budan 20 jyl buryn ornatylǵan. 2019 jyly josparly inspektsiialyq tekseris júrgizilgenimen, jóndeý jumystary ártúrli sebeptermen keshiktirilgen. Másele oblys ákimi Nariman Tóreǵalievtiń tikelei aralasýymen sheshimin tapty.
2023 jyly aimaq basshysy bastaǵan Batys Qazaqstan oblysynyń delegatsiiasy Japoniiaǵa baryp, týrbinany óndirýshi zaýyt ókilderimen kelissóz júrgizdi. Nátijesinde qosalqy bólshekterdi daiyndaý jáne jetkizý boiynsha kelisimshart jasalyp, kúrdeli jóndeý jumystaryn atyraýlyq kompaniia júzege asyrdy.
Energetikalyq infraqurylymdy jańǵyrtý aiasynda sońǵy eki jylda salaǵa 15,6 mlrd teńge bólingen. 2035 jylǵa deiingi kezeńge arnalǵan 32 jobadan turatyn Jol kartasy boiynsha sorǵy stantsiialary men jańa qazandyqtar salý, sondai-aq qalanyń negizgi jylý magistraldaryn jańartý jumystary júrgizilip jatyr. Qazirgi ýaqytta №6 jáne №7 jylý jelilerin jańǵyrtý jobalary iske asýda.
Saltanatty iske qosý rásiminde oblys ákimi atqarylyp jatqan sharalar óńirdiń energetikalyq qaýipsizdigin nyǵaityp, kommýnaldyq sektordyń senimdiligin arttyratynyn aitty. Sonymen qatar, jylý jáne sýmen jabdyqtaý júielerin tsifrlandyrý máselesine de toqtaldy.
Aitýynsha, bolashaqta qalanyń kommýnaldyq infraqurylymy tolyq avtomattandyrylyp, ortalyqtandyrylǵan basqarý júiesi engiziledi. Bul aqaýlardy jedel anyqtaýǵa jáne qyzmetterdiń úzdiksiz jumysyn qamtamasyz etýge múmkindik beredi.
