ورال قالاسىنداعى جىلۋ ەلەكتر ورتالىعىندا جاپوندىق Hitachi كومپانياسىنىڭ گاز تۋربينالىق قوندىرعىسى كۇردەلى جوندەۋدەن كەيىن تولىق قۋاتىندا جۇمىسىن باستادى، دەپ حابارلايدى Dala News.

قۋاتى 28 مۆت بولاتىن گاز تۋربينالى قوندىرعى بۇدان 20 جىل بۇرىن ورناتىلعان. 2019 جىلى جوسپارلى ينسپەكسيالىق تەكسەرىس جۇرگىزىلگەنىمەن، جوندەۋ جۇمىستارى ءارتۇرلى سەبەپتەرمەن كەشىكتىرىلگەن. ماسەلە وبلىس اكىمى ناريمان تورەعالييەۆتىڭ تىكەلەي ارالاسۋىمەن شەشىمىن تاپتى.

2023 جىلى ايماق باسشىسى باستاعان باتىس قازاقستان وبلىسىنىڭ دەلەگاسياسى جاپونياعا بارىپ، تۋربينانى ءوندىرۋشى زاۋىت وكىلدەرىمەن كەلىسسوز جۇرگىزدى. ناتيجەسىندە قوسالقى بولشەكتەردى دايىنداۋ جانە جەتكىزۋ بويىنشا كەلىسىمشارت جاسالىپ، كۇردەلى جوندەۋ جۇمىستارىن اتىراۋلىق كومپانيا جۇزەگە اسىردى.

ەنەرگەتيكالىق ينفراقۇرىلىمدى جاڭعىرتۋ اياسىندا سوڭعى ەكى جىلدا سالاعا 15،6 ملرد تەڭگە بولىنگەن. 2035 جىلعا دەيىنگى كەزەڭگە ارنالعان 32 جوبادان تۇراتىن جول كارتاسى بويىنشا سورعى ستانسيالارى مەن جاڭا قازاندىقتار سالۋ، سونداي-اق قالانىڭ نەگىزگى جىلۋ ماگيسترالدارىن جاڭارتۋ جۇمىستارى جۇرگىزىلىپ جاتىر. قازىرگى ۋاقىتتا №6 جانە №7 جىلۋ جەلىلەرىن جاڭعىرتۋ جوبالارى ىسكە اسۋدا.

سالتاناتتى ىسكە قوسۋ راسىمىندە وبلىس اكىمى اتقارىلىپ جاتقان شارالار ءوڭىردىڭ ەنەرگەتيكالىق قاۋىپسىزدىگىن نىعايتىپ، كوممۋنالدىق سەكتوردىڭ سەنىمدىلىگىن ارتتىراتىنىن ايتتى. سونىمەن قاتار، جىلۋ جانە سۋمەن جابدىقتاۋ جۇيەلەرىن سيفرلاندىرۋ ماسەلەسىنە دە توقتالدى.

ايتۋىنشا، بولاشاقتا قالانىڭ كوممۋنالدىق ينفراقۇرىلىمى تولىق اۆتوماتتاندىرىلىپ، ورتالىقتاندىرىلعان باسقارۋ جۇيەسى ەنگىزىلەدى. بۇل اقاۋلاردى جەدەل انىقتاۋعا جانە قىزمەتتەردىڭ ۇزدىكسىز جۇمىسىن قامتاماسىز ەتۋگە مۇمكىندىك بەرەدى.