Oral qalasynda áleýmettik jeliler arqyly týrısik qyzmet túrimen jasalǵan alaıaqtyq áreket áshkerelendi. Qala turǵyny anasyn jeke kásipker retinde tirkep, zańdy kásipkerlik qyzmet túrin búrkemelep, jalǵan týrısik baǵyttardy usynǵan,- dep habarlaıdy Dalanews.kz BQO prokýratýrasyna silteme jasap.

Ol áleýmettik jelilerge jarnama ornalastyryp, klıenttermen resmı kelisimsharttar jasaǵan, fıskaldyq chekter bergen jáne messendjerler arqyly baılanys júrgizip otyrǵan. Osy tásilder alaıaqtyń qyzmetine degen senimdi arttyryp, azamattardyń aldanýyna sebep bolǵan.

Nátıjesinde 15-ten astam adam onyń qurbanyna aınalyp, jalpy shyǵyn kólemi 25 mıllıon teńgeden asqan.

Oral qalalyq sotynyń úkimimen ol eki nemese odan da kóp adamǵa qatysty asa iri kólemde alaıaqtyq jasaǵany úshin kináli dep tanylyp, 5 jyl merzimge bas bostandyǵynan aıyryldy. Sonymen qatar, sot úkimimen oǵan 7 jyl boıy týrızm salasynda kásipkerlikpen aınalysýǵa tyıym salyndy.

Quzyrly organdar turǵyndardy ınternet arqyly kórsetiletin qyzmet túrlerine saqtyqpen qaraýǵa shaqyrady.